16 октябрь куни АҚШ президенти Дональд Трамп Россия президенти Владимир Путин билан телефон орқали мулоқот қилди.
«Будапештда учрашамиз»
«Мен ҳозиргина Россия президенти Владимир Путин билан телефон орқали мулоқотимни якунладим ва у жуда самарали кечди», — деб ёзди Трамп ўзининг Truth Social тармоғида.
«Путин мени ва Қўшма Штатларни Яқин Шарқда юз йиллар давомида орзу қилинган Тинчликнинг буюк ютуғи (Исроил ва ҲАМАС ўртасидаги сулҳ — таҳр.) билан табриклади. Аслида, Яқин Шарқдаги муваффақият Россия/Украина билан урушни тугатиш бўйича музокараларимизга ёрдам беришига ишонаман», — деди АҚШ президенти.
«Биз, шунингдек, Украина билан уруш тугагач, Россия ва АҚШ ўртасидаги савдо ҳақида кўп гаплашдик», — деб ёзди Трамп.
Суҳбат якунида, шунингдек, келгуси ҳафта олий даражадаги маслаҳатчиларнинг учрашуви бўлиб ўтишига келишиб олингани айтилди.
«Қўшма Штатларнинг дастлабки учрашувларини давлат котиби Марко Рубио бошқа турли одамлар билан биргаликда олиб боради. Учрашув жойи аниқланиши керак. Кейин президент Путин ва мен келишилган жойда, Венгриянинг Будапешт шаҳрида учрашиб, Россия ва Украина ўртасидаги бу „шармандали“ урушга чек қўя оламизми ёки йўқлигини кўриб чиқамиз», — деди Трамп.
АҚШ етакчиси Зеленский билан 17 октябрь куни Овал кабинетда учрашиб, у ерда Путин билан кечган суҳбатни ва бошқа кўп нарсаларни муҳокама қилишини қўшимча қилди.
Бугунги телефон орқали мулоқотда катта силжиш бўлди, деб ўйлайман, дея постни якунлади Трамп.
«Киевга Tomahawk`ларни топшириш Россия-АҚШ муносабатларига путур етказади»
Путиннинг ёрдамчиси Юрий Ушаков Россия ва АҚШ президентлари суҳбати якунлари бўйича баёнот берди.
Унинг билдиришича, Путин ва Трамп 2,5 соат давом этган саккизинчи телефон суҳбатини ўтказди. Суҳбат Россия ташаббуси билан бўлиб ўтди.
Бошқа тафсилотлар:
- Путин Трамп билан суҳбатда Украина инқирози билан боғлиқ вазиятга батафсил баҳо берди. Россия Қуролли кучлари бутун жанговар тўқнашув чизиғи бўйлаб стратегик ташаббусга тўлиқ эгалик қилмоқда.
- Трамп Путин билан суҳбатда можароларни ҳал қилишдаги муваффақиятлари ҳақида гапирди. Асосий тезис — Украинадаги можаронинг тугаши Россия ва АҚШ ўртасидаги иқтисодий ҳамкорлик учун улкан истиқболларни очади.
- Суҳбат чоғида Киевга Tomahawk`ларни етказиб бериш муаммоларига тўхталиб ўтилди. Путин Киевга Tomahawk`ларнинг эҳтимолий етказиб берилиши фронтдаги вазиятни ўзгартириши, аммо Россия ва АҚШ муносабатларига путур етказиши ҳақидаги тезисни такрорлади.
- Путин ва Трамп шахсий учрашув ўтказиш имкониятларини муҳокама қилди, Россия ва АҚШ вакиллари зудлик билан саммитга тайёргарлик кўришга киришади.
- Путин ва Трамп саммитига тайёргарлик ишлари Лавровнинг Рубио билан телефон орқали мулоқотидан бошланади. Рубио ва Лавров иш олиб борар экан, саммит қачон ташкил этилиши ойдинлашади.
- Путин ва Трамп учрашуви Будапештда ташкил этилиши мумкин, Трамп бу жойни тилга олди, Путин бу таклифни қўллаб-қувватлади. Эҳтимолий саналар икки давлат вакиллари томонидан муҳокама қилинади.
- Путин Трампдан рафиқаси Меланига энг эзгу тилакларини етказишни сўради, у Мелания Трампга россиялик ва украиналик болаларни оилалари билан бирлаштириш масаласидаги иштироки учун миннатдорлик билдирди.