Мўғулистон парламенти 17 октябрь куни ялпи мажлисда овоз бериш йўли билан бош вазир Гомбожавин Занданшатарнинг лавозимидан озод этилиши тўғрисида қарор қабул қилди, деб ёзмоқда Хитой миллий телерадиокомпанияси (CCTV).
Қайд этилишича, 111 нафар депутат овоз беришда иштирок этди, улардан 71 нафари Занданшатарнинг лавозимидан озод этилишини қўллаб-қувватлади, 40 нафари қарши овоз берди.
Яқинда параламентнинг ўнлаб аъзоси Занданшатарнинг ҳукмронлиги даврида конституцияни бузгани каби сабабларга кўра, уни бош вазир лавозимидан озод қилишни талаб қилганди, деб таъкидлади CCTV. Аммо бу қандай бузилиш экани келтирилмаган.
Занданшатар 2025 йилнинг июнь ойидан бери Мўғулистон бош вазири лавозимида ишлаб келаётган эди. 2019 йилдан мамлакат парламенти раиси бўлган. 2009 йил ноябридан 2012 йил августигача Занданшатар Мўғулистон ташқи ишлар ва савдо вазири лавозимида ишлаган.
Занданшатарнинг [лавозимдан] кетиши Мўғулистоннинг чуқур сиёсий беқарорлиги ва нозик коалиция сиёсатини таъкидлайди. Раҳбарларнинг тез-тез ўзгариши узоқ муддатли сиёсатни ишлаб чиқишга тўсқинлик қилди ва инвесторларнинг иқтисодиётнинг асосий драйвери бўлган муҳим тоғ-кон саноатига бўлган ишончини сусайтирди. Ҳаракат, шунингдек, келгуси йилги сайловлар олдидан ҳукмрон партия бирдамликни сақлаб қола оладими, деган саволларни ҳам келтириб чиқаради, деб ёзди Modern Diplomacy.
Мўғулистон парламенти тез орада янги бош вазир номзодини илгари суриш учун йиғилиши кутилмоқда, унда ҳукмрон партиянинг бир қатор арбоблари кўриб чиқилаётгани айтилмоқда.
Занданшатарнинг ўтмишдоши Лувсаннамсрайн Оюун-Эрдэнэ (2021 йил январидан 2025 йил июнигача Мўғулистон бош вазири) мамлакатда коррупция ва оммавий норозилик намойишлари бўйича айбловлардан сўнг лавозимини тарк этганди. Митинглар унинг ўғлининг унаштирув маросими видеоси билан бошланган, унда 23 ёшли йигит келинга бриллиант узук, Mercedes автомобили ва бренд сумка совға қилган, шунингдек, вертолётда парвоз уюштирган.
Гомбожавин Занданшатар 1987−1992 йилларда Иркутск халқ хўжалиги институтида (ҳозирги Байкал давлат университети) молия ва иқтисод бўйича таҳсил олган. 2019−2024 йилларда парламент спикери бўлган, 2024 йилдан Мўғулистон президенти аппаратига раҳбарлик қилган.
Октябрь ойи бошида Франция бош вазири Себастьен Лекорню ҳукуматнинг янги таркиби Эммануэль Макрон тарафдорлари ва мухолифат томонидан танқид қилинганидан сўнг ўз хоҳишига кўра ишдан бўшаш ҳақида ариза ёзганди. Бироқ 10 октябрь куни Франция президенти уни яна бош вазир лавозимига тайинлаган.