Хитой Тижорат вазирлиги АҚШ Пекин томонидан нодир металлар экспорти устидан назорат чоралари киритилганидан кейин бутун дунёда атайлаб ваҳима қўзғатганини маълум қилди, деб ёзмоқда Reuters.
9 октябрь куни ХХР нодир ер элементлари билан боғлиқ технологиялар устидан экспорт назоратини кучайтиришини эълон қилди. «Ноёб ер металларини қазиб олиш, эритиш ва ажратиш, шунингдек, металларни эритиш, магнит материалларини ишлаб чиқариш ва таркибида ноёб ер элементлари бўлган иккиламчи ресурсларни қайта ишлаш ва утилизация қилиш билан боғлиқ технологиялар ва уларнинг ташувчилари тегишли рухсатномасиз экспортга чиқарилмайди», — дейилади Хитой Тижорат вазирлиги хабарида.
Қарор АҚШ президенти Дональд Трамп ва Хитой раиси Си Цзиньпиннинг 2025 йил 31 октябрдан 1 ноябргача Жанубий Кореяда бўлиб ўтадиган Осиё-Тинч океани иқтисодий ҳамкорлик форуми саммитида кутилаётган учрашуви арафасида эълон қилинди. Бунга жавобан Трамп АҚШ 1 ноябрдан Хитойдан импортга қўшимча 100 фоизли божлар жорий этишини айтди.
АҚШ савдо вакили Жеймисон Грир бир кун аввал Хитойнинг янги чораларини «глобал таъминот занжирида ҳокимиятни ўзлаштириш» деб атади ва АҚШ Пекин уларни қўлламаслигини кутаётганини билдирди.
«АҚШнинг интерпретацияси Хитойнинг нодир ер элементлари экспортини назорат қилиш бўйича чора-тадбирларини қўпол равишда бузиб кўрсатади ва бўрттиради, атайлаб кераксиз тушунмовчиликлар ва ваҳимага сабаб бўлади», — деди Хитой Тижорат вазирлиги вакили Хэ Юнцянь.
«Экспорт лицензиялари учун аризалар талабларга жавоб берса ва фуқаролик мақсадларида фойдаланишга мўлжалланган бўлса, улар тасдиқдан ўтади», — дея қўшимча қилди у.
Reuters нашрининг хабар беришича, Пекиннинг нодир ер элементлари экспорти устидан назоратни кучайтириши бутун дунё бўйлаб савдо иштирокчилари ва таҳлилчиларни хавотирга солмоқда. Улар Хитойнинг дунёнинг исталган нуқтасида оз миқдорда бўлса-да, Хитой нодир ер элементларини ўз ичига олган ҳар қандай маҳсулот ишлаб чиқарувчилардан уни якуний манзилга жўнатиш учун лицензия олишни талаб қилишидан чўчимоқда.
Хэ Юнцянь журналистларга бундай бўлмаслигини айтди.
