Ўзбекистон миллий терма жамоасининг собиқ бош мураббийи Сречко Катанецнинг уч нафар ёрдамчииси Ўзбекистон футбол ассоциациясидан (ЎФА) 350 минг евро ундирмоқчи, деб хабар бермоқда Asia_SportUZ Telegram канали.
Манбага кўра, словениялик мутахассислар Халқаро футбол федерацияси (ФИФА) Низоларни ҳал қилиш палатасига шикоят аризаси билан мурожаат қилиб, уларга тахминан 350 минг евро берилиши кераклигини айтган.
Уларнинг шартномалари 2026 йилнинг ёзига қадар мўлжалланган эди, бироқ у Фабио Каннаваро бошчилигидаги янги мураббийлар штаби тайинланганидан кейин бекор қилинди.
Уларга ёшлар терма жамоалари билан ишлаш имконияти таклиф қилинган, бироқ улар келишув миллий терма жамоани жаҳон чемпионатига тайёрлаш учун махсус тузилганини тушунтириб, рад жавобини берган.
ЎФА позицияси
Бунга жавобан Футбол ассоциацияси собиқ бош мураббий ёрдамчиларининг шартномалари шартномалардаги «бош мураббийнинг меҳнат шартномаси бекор бўлганда ёрдамчи мураббийларнинг ҳам шартномаси бир вақтнинг ўзида бекор бўлиши» бандига мувофиқ автоматик тарзда бекор қилинганини маълум қилди.
«Собиқ бош мураббий шартномасининг тарафларнинг розилиги билан бекор бўлиши ва жамоага янги мураббийлар штабининг келиши собиқ мураббийлар штаби аъзоларининг шартномаларининг ҳам бекор бўлишига олиб келади», — дейилади хабарда.
Ассоциациянинг таъкидлашича, бундай банднинг меҳнат шартномаларига киритилиши ФИФА ва Спорт арбитраж суди (CAS) юриспруденциясига кўра одатий амалиёт ҳисобланади.
Спорт ташкилоти штабнинг собиқ аъзоларига бошқа ёш гуруҳлари билан ишлашни давом эттириш таклиф қилинганини тасдиқлади, аммо «улар таклифни рад этган».
Сречко Катанецнинг мураббийлар штабига словениялик беш нафар мутахассис: ассистентлар Алеш Чех ва Владо Радманович, жисмоний тайёргарлик бўйича мураббий Мартин Магистер, дарвозабонлар мураббийи Нихад Пейкович ва физиотерапевт Иан Катанец киритилган.
Эслатиб ўтамиз, Сречко Катанец Ўзбекистон миллий терма жамоасини 2021 йил август ойидан бошқара бошлаган ва 2025 йилнинг январида соғлиғи билан боғлиқ муаммолар туфайли ўз лавозимини тарк этганди. Бош мураббийлик лавозимини Тимур Кападзе эгаллади, у, жумладан, Катанец штаби аъзолари билан бирга Ўзбекистон терма жамоасини тарихидаги илк жаҳон чемпионатига олиб чиқди.
6 октябрь куни 52 ёшли италиялик Фабио Каннаваро жамоа бош мураббийига айланди.
Аввалроқ Ўзбекистон футбол ассоциацияси ЖЧ-2026 саралаш босқичи доирасида Тошкентда Қатарга қарши ўтказилган ўйинда ёпилиш маросимини Осиё футбол конфедерацияси рухсатисиз ташкил этгани ва BYD автомобиллари иштирокида «эмбуш-маркетинг»га йўл қўйгани учун 340 минг доллар жаримага тортилган эди.