Raiffeisen Bank International (RBI) кузатув кенгаши ўзбекистонлик Камила Маҳмудовани 2026 йил 1 январдан бошлаб RBI бошқарувида CFO (Chief Financial Officer) — молиявий директор лавозимига тайинлади. Шу тариқа, молиявий директор функцияси яна директорлар кенгашининг алоҳида бўлинмасига ажратиладиган бўлди.
Энди тайинлов банкнинг назорат органлари томонидан тасдиқланиши керак.
Камила Маҳмудова 1997 йилда Ўзбекистон Жаҳон иқтисодиёти ва дипломатия университетини битирган. Бундан ташқари, турли йилларда Иллинойс коллежи (АҚШ), Вена иқтисодиёт ва бизнес университети (Австрия), Карлсон менежмент мактаби (АҚШ), Гарвард бизнес мактаби (АҚШ)да таҳсил олган.
У 1999 йилдан 2001 йилгача Ўзбекистон Давлат мулки қўмитасида юрисдикция бошлиғи сифатида фаолият юритган.
Камила Маҳмудова банк соҳасида 20 йилдан ортиқ тажрибага эга. 2001−2007 йилларда Халқаро молия корпорациясида консультант бўлиб ишлаган. RBI`даги фаолиятини 2007 йилда M&A (Бирлашиш ва қўшиб олиш) бўлимида бошлаган, у ерда кўплаб харид лойиҳаларини бошқарган ва 2019 йилда «Корпоратив ривожланиш ва стратегик бошқарув» йўналишига ўтган. 2021 йил декабрь ойида у Чехиядаги Raiffeisenbank бошқарувининг молиявий директори этиб тайинланган.
«Маҳмудованинг олдида мураккаб вазифа турибди. Raiffeisen Bank International`нинг Россиядаги фаолияти Украинага қарши тажовуз ва у билан боғлиқ санкциялардан сўнг жиддий сиёсий баҳсларга сабаб бўлди. RBI Россиядаги фаолиятини янада қисқартириш ниятида эканини мунтазам равишда таъкидлаб келмоқда», деб таъкидлади Австриянинг Die Presse нашри.
Der Standard нашрига берган интервьюсида Маҳмудова киноижодкорларнинг қизи эканини айтган. «Мен ижодкорликни жуда қадрлайман, лекин кўпроқ структурали одамман. Шунинг учун ота-онамнинг изидан бормасликка қарор қилдим. Бундан ташқари, 1990-йилларда, мустақиллик қўлга киритилгандан ва мамлакат очилгандан сўнг, ҳуқуқ ва ислоҳотлар ҳақида кўп гапирилди. Ўшанда мен тезда тушуниб етдим: ҳуқуқшунослик — мен шуғулланишни хоҳлайдиган соҳа», — деган у.
Ўзбекистон ва АҚШда ҳуқуқшунослик факультетида таҳсил олгач, мамлакатдаги Жаҳон банки ва Халқаро молия корпорациясида (IFC) хусусийлаштириш лойиҳалари билан шуғуллана бошлаган. Мақсад бутун Марказий Осиё минтақаси бўйлаб тегишли молиялаштириш воситаларини жорий этиш эди — бу унга катта таъсир кўрсатган тажриба:
«Ўшанда мен банк иши одамлар учун нима қилиши мумкинлигини тушундим: кимдир кичик машина учун кредит олиб, такси хизматини очади, бошқаси музлаткич сотиб олиб, озиқ-овқат дўкони очади, учинчиси завод қуради ва иш ўринлари яратади. Шундай қилиб, бутун мамлакатлар ва минтақалар ижобий йўналишда ривожланиши мумкин».
Raiffeisen Bank International ҳақида
Raiffeisen Bank International — Австриянинг энг йирик банк гуруҳларидан бири, кооператив банк (Raiffeisenkasse номи билан 1886 йилда Қуйи Австриянинг Мюльдорф шаҳрида ташкил топган). Бош қароргоҳи Венада жойлашган. У Марказий ва Шарқий Европанинг 11 бозорида 18,1 миллион мижозга хизмат кўрсатади. Бундан ташқари, RBI Group лизинг, активларни бошқариш ва М&А каби кўплаб бошқа молиявий хизматларни таклиф этади.
Жами активлари 204 млрд еврони ташкил этади (2025 йил июнь ҳолатига кўра).