Тошкентнинг янги аэропорти учун Саудиянинг Vision Invest компанияси ва АҚШнинг Air Products компанияси билан биргаликда барқарор авиация ёқилғиси (SAF) ишлаб чиқариш йўлга қўйилади. Бу ҳақда энергетика вазири Жўрабек Мирзамахмудов «Ўзбекистон 24» телеканалига берган интервьюсида маълум қилди.
«Саудиянинг Vision Invest компанияси ҳамда Американинг Air Products компанияси билан келишувга эришдик, улар билан биргаликда янги аэропорт учун SAF (sustainable aviation fuel), яъни барқарор авиация ёқилғиси, яъни тўлиқ қайта тикланувчи ёқилғини ишлаб чиқариш ва аэропортни таъминлаш бўйича янги бир лойиҳани бошлаяпмиз», — деди вазир Шавкат Мирзиёевнинг Саудия Арабистони етакчи ишбилармон доиралари вакиллари билан учрашувидан сўнг.
Шунингдек, у Саудия компаниялари билан энергетика соҳасида амалга оширилаётган бошқа бир қатор лойиҳалар ҳақида ҳам айтиб ўтди. Хусусан, ACWA Power компанияси билан биринчи йирик иссиқлик электр станцияси ишга туширилган. Бундан ташқари, Тошкент вилояти Қибрай туманида қуёш станцияси, Бухорода иккита йирик шамол станцияси, Қорақалпоғистон ҳудудида 100 мегаваттлик биринчи шамол электр станцияси иш бошлаган.
«Ҳозирги кунда биз янги шамол ва қуёш станциялари бўйича амалий ишларни бошладик. Шунингдек, Паркент туманидаги биринчи энг йирик батарея сақлаш тизимини ҳам ишга тушириш режалаштирилган», — деди Жўрабек Мирзамахмудов.
Унинг сўзларига кўра, ACWA Power билан ҳамкорлик доирасида кадрлар тайёрлашга ҳам алоҳида эътибор берилган. «Жумладан, Сирдарё вилоятининг Ширин шаҳридаги энергетика коллежини тўлиқ уларнинг шафелилигига олинган, ҳозир у ерда мутлақо янги ўқитиш тизими жорий қилинган. Хорижий тилларни, замонавий технологияни ўқитиш орқали нафақат Ўзбекистонда, балки ACWA Power компанияси томонидан бутун дунёда амалга оширилаётган лойиҳалар ёш мутахассислар билан таъминланмоқда», — деди энергетика вазири.
Шунингдек Саудиянинг Pemco хусусий компанияси билан ҳам келишувга эришилган бўлиб, йил охиригача Самарқанд вилоятида 200 мегаваттлик газ-поршенли янги иссиқлик электр станциясини қуриб, ишга тушириш режалаштирилган. Июнь йил якунигача амалий ишларга ўтиш кўзда тутилмоқда.
Эслатиб ўтамиз, 15 октябрь куни Шавкат Мирзиёев Саудия Арабистони подшоҳлиги инвестициялар вазири Холид ал-Фалиҳни қабул қилди. Шунингдек, Саудия Арабистонининг етакчи компаниялари раҳбарлари билан учрашув ўтказди. «Ўзбекистон ривожига катта ҳисса қўшаётган саудиялик ҳамкорларимизни биз доим юксак қадрлаймиз», — деди президент.
Шунингдек, президент 1300 гектар майдонда Тошкентнинг янги халқаро аэропорти қурилишини бошлаб берди. Лойиҳа тўрт босқичдан иборат бўлади. Қиймати $2,5 млрд бўлган биринчи босқич аэровокзал комплекси ва аэродром қурилишини ўз ичига олади. Ҳамкорлар сифатида Саудия Арабистони, Япония ва Корея компаниялари танланди.
Президентнинг АҚШга ташрифидан сўнг Жўрабек Мирзамаҳмудов Ўзбекистон ва АҚШ 3−4 млрд долларлик энергетика лойиҳалари бўйича келишувга эришганини маълум қилган эди. Шу жумладан, Air Products билан кўмирни газлаштириш, синтез-газ олиш ва ундан аммиак, метанол ҳамда қўшимча қийматга эга бошқа маҳсулотлар ишлаб чиқариш бўйича келишиб олинган. Шунингдек, компания янги инвестициялар киритиш ва фаолият йўналишларини диверсификация қилишга тайёрлигини билдирган.