Футбол бўйича Ўзбекистон ўсмирлар терма жамоаси бош мураббийи Ислом Исмоилов 17 ёшгача бўлган футболчилар ўртасидаги Жаҳон чемпионатида Парагвай устидан қозонилган ғалабадан сўнг (2:1) ўйин таассуротлари билан ўртоқлашди ва жамоа ҳаяжонни енгиб, мураббийлар штаби кўрсатмаларини бажарганини таъкидлади.
«Албатта, оғир кечган ўйинда ғалаба қозондик. Бунақа турнирларда рақибдан олдин ҳаяжонни енгиш биринчи ўйинда талаб этилади. Бунинг устида жуда кўп ишларни олиб бордик, лекин, шунга қарамасдан, барибир ёш футболчилар ҳаяжони ўйин давомида сезилиб турди», — дейди Исмоилов.
Мураббийнинг сўзларига кўра, жамоа ўйинни назорат қилган ва ўз вақтида ҳимояга ўтишга муваффақ бўлган.
«Ўша 2:0 ғалаба қозонаётган пайтимизда керакли пайтда ҳимояланишни ҳам билдик. Бу олдиндан ўйланган режа эди. Футболчилар ўйиндан олдин мураббийлар томонидан айтилган барча тўлиқ кўрсатмаларни бажариб беришди. Бунинг учун уларга ўзим миннатдорлигимни билдираман», — дея таъкидлади у.
Мураббий рақибнинг кучи ва ўзбек жамоасининг тактик тайёргарлигини таъкидлади:
«Рақиб жисмонан ўта кучли жамоа эди. Шунинг ҳисобига биз кўпроқ тактик ҳамда ўша ўйинни тезлаштиришни режа қилгандик. Биринчи таймда бу нарсалар амалга ошди».
Исмоилов ёш футболчиларнинг эмоционал фонига ҳам эътибор қаратди. Биринчи ўйиндаёқ Ўзбекистоннинг 5 нафар футболчиси қоидабузарлиги учун сариқ карточка билан жазоланди.
«Мана, кузатаётган бўлсангиз, шу кунгача саккизта-тўққизта учрашув ўтган бўлса, ҳамма учрашувларда футболчилар, керак бўлса, қизил карточкалар оляпти. Биз ўйиндан олдин бу нарсаларни тушунтирамиз, огоҳлантирамиз. Ҳар битта эпизод юзасидан футболчилар билан руҳий ҳолати бўйича алоҳида ишлаймиз, лекин ўйинда бу барибир ёш билан боғлиқ деб ўйлайман», — деб ҳисоблайди устоз.
«Лекин буларни кўриб чиқамиз. Энг муҳими ғалаба қозониш эди. Буни футболчилар уддалашди», — дея хулоса қилди мураббий.
Футбол мутахассиси Алишер Никимбаев ортиқча огоҳлантиришлар нафақат гуруҳдаги ўринлар тақсимотига, балки жамоаларнинг гуруҳ босқичидан кейинги умумий рейтингига ҳам қандай таъсир қилиши мумкинлигини тушунтирди.
«Эслатиб ўтаман, бу турнирда плей-офф сеткаси тахминан Европа Чемпионлар Лигаси ва Осиё Чемпионлар Лигасидаги каби тузилади — умумий рейтинг бўйича: 1-жамоа 32-жамоага қарши ўйнайди, 2-жамоа 31-жамоага қарши ва ҳоказо. Умумий рейтингнинг ўзи қуйидагича тузилади: илк 12 ўринни тўпланган очколар, тўплар фарқи ва ҳоказолар, шу жумладан, жарима очколарига кўра гуруҳ ғолиблари эгаллайди; кейинги 12 та ўринни иккинчи ўринни эгаллаган жамоалар, 25 дан 32 гача — учинчи а гуруҳидаги энг яхши саккизта жамоа. Агар барча жамоаларнинг кўрсаткичлари бир хил бўлса, ўринлар қуръа ташлаш йўли билан тақсимланади», — деди у.
Мисол учун, айни дамда Ўзбекистон терма жамоаси ўз ўйинларида 2−1 ҳисобида ғалаба қозониб, гуруҳларда иккинчи бўлиб бораётган Корея ва Канададан кейин 19-ўринни эгаллаб турибди. Лекин ўша жамоалар жарима очколари ҳисобига юқорида: Кореяда огоҳлантириш йўқ, Канадада иккита сариқ карточка бор.
«Рейтингдаги ўрин қанчалик паст бўлса, 1/16 финалдаги рақиб шунчалик кучли бўлади», — деб ёзди у.
Эслатиб ўтамиз, Қатарда 17 ёшгача бўлган футболчилар ўртасидаги Жаҳон чемпионати 27 ноябрга қадар давом этади. Ўзбекистон биринчи турдан кейин J гуруҳида иккинчи ўринни эгаллаб турибди. Пешқадам Ирландия бўлди, у Панамани мағлуб этди (3:0). 8 ноябрь куни соат 20:45 да ўсмирлар жамоаси Ирландия билан, 11 ноябрь куни соат 18:30 да Панама билан ўйнайди.
Ҳар бир гуруҳдан дастлабки икки ўринни эгаллаган жамоалар ва учинчи ўринни эгаллаган энг яхши саккиз жамоа 1/16 финалга йўл олади. Чемпионлик унвонини 2023 йилда Индонезияда бўлиб ўтган олдинги ўйинда ғалаба қозонган Германия ҳимоя қилади.