General Motors International компанияси Ўзбекистонда маҳсулотлар турини кенгайтиришни ва маҳаллийлаштиришни чуқурлаштиришни режалаштирмоқда. Бу ҳақда Вашингтонда Шавкат Мирзиёев ва компания глобал ижрочи директори Шилпан Амин ўртасидаги учрашувда айтиб ўтилди, деб хабар беради президент матбуот хизмати.
Таъкидланишича, ушбу корпорация билан узоқ муддатли ҳамкорликни янада кенгайтириш масалалари кўриб чиқилган. General Motors International компаниясининг Ўзбекистон автомобиль саноатини ривожлантириш ва диверсификация қилишдаги муҳим ўрни қайд этилган.
Шавкат Мирзиёев ва Шилпан Амин. Фото: Президент матбуот хизмати
«Ишлаб чиқариш кооперациясини янада ривожлантириш, маҳсулотлар турини кенгайтириш ва маҳаллийлаштиришни чуқурлаштиришга алоҳида эътибор қаратилди», — дейилади хабарда.
Шунингдек, замонавий машинасозликда талаб юқори бўлган янги технологиялар ва хомашё ресурслари соҳасида қўшма лойиҳаларни амалга ошириш истиқболлари муҳокама қилинган.
Қайд этилишича, сўнгги 5 йил ичида компания томонидан 1,6 миллион дона автомобиль ишлаб чиқарилган, Ўзбекистон Chevrolet бренди учун АҚШдан кейин иккинчи йирик бозорга ҳамда Марказий Осиё ва МДҲ бозорларида сотувлар бўйича етакчига айланган.
Эслатиб ўтамиз, Шавкат Мирзиёев сентябрь ойида Нью Йоркда АҚШнинг етакчи компаниялари, жамғарма ва молиявий институтлари раҳбарлари билан давра суҳбати ўтказган, улар орасида General Motors топ-менежерлари ҳам бор эди.
