Почта ва курьерлик жўнатмалари учун божхонада «қизил», «сариқ» ва «яшил» йўлаклар жорий этилади. Бу ҳукуматнинг 6 ноябрдаги қарори [700-сон] билан тасдиқланган «Халқаро почта ва курьерлик жўнатмаларини божхона назорати ва расмийлаштирувидан ўтказиш тартиби тўғрисида»ги низомда кўзда тутилган.
Низомга кўра, почта ва курьерлик жўнатмаларида юбориладиган ҳамда божхона чегараси орқали олиб ўтиладиган товарлар божхона назоратидан ўтказилиши керак.
Почта алоқаси оператори ва экспресс ташувчи томонидан почта ва курьерлик жўнатмалари божхона кўздан кечируви ҳамда божхона кўригини ўтказиш учун божхона органларига тақдим этилади.
Ушбу жўнатмалар орқали олиб кириладиган ва юбориладиган товарлар божхона назоратида ташиш шартларига риоя этган ҳолда манзил божхона постига етказилади.
Жўнатмаларни ташиш, юклаш (қайта юклаш), тушириш, сақлаш ва бошқа шу каби юк операцияларини амалга оширишда юзага келадиган харажатлар почта алоқаси оператори ёки экспресс ташувчи ҳисобидан қопланади.
Почта ва курьерлик жўнатмаси божхона органлари томонидан хавфни бошқариш тизимини қўллаган ҳолда «қизил», «сариқ» ва «яшил» йўлаклар орқали рўйхатга олинган жўнатмалар декларацияси асосида божхона назоратидан ўтказилади.
Апрель ойида Вазирлар Маҳкамаси жисмоний шахслар томонидан товарларни божсиз олиб киришнинг янги меъёрларини тасдиқлаганди. Унга кўра, 1 майдан бошлаб жисмоний шахсларга халқаро куьрерлик жўнатмалари орқали етказиб бериладиган товарлар учун ставка ҳар чоракда 1000 доллардан ойига 200 долларгача қисқартирилди. Почта орқали қабул қилинган товарлар учун лимит 100 доллар миқдорида қолди. Шундан кейин Gazeta курьерлик жўнатмаларига оид янги тартиб бўйича Божхона қўмитаси расмийлари билан суҳбатлашганди.
Аввалроқ «Юксалиш» умуммилий ҳаракати янги божсиз нормалар фуқароларга қўшимча молиявий харажат юклашдан ташқари, бозордаги рақобатга ҳам таъсир кўрсатаётганини таъкидлаганди. Шунингдек, «Юксалиш» раиси Бобур Бекмуродов Ўзбекистонга шахсий эҳтиёж учун олиб кириладиган товарлар бўйича божсиз нормалар ҳақида гапириб, аналоги йўқ товарларга лимит қўйиш унчалик мантиқий эмаслигини қайд этди.
