Ўзбекистон президенти Шавкат Мирзиёев 6 ноябрь куни АҚШда General Motors International компаниясининг глобал ижрочи директори Шилпан Амин билан учрашганди.
Учрашувда корпорация билан узоқ муддатли ҳамкорликни янада кенгайтириш, автомобилсозлик ва янги технологиялар соҳасида қўшма лойиҳаларни амалга ошириш масалалари муҳокама қилинган.
Давлат раҳбари General Motors компаниясининг Ўзбекистонда автомобилсозлик саноатини ривожлантириш ва диверсификациялашдаги муҳим ролини таъкидлаган.
Шилпан Амин «Ўзбекистон 24» телеканалига берган интервьюсида Ўзбекистон General Motors компанияси учун стратегик муҳим давлат эканини таъкидлади.
«Биз Ўзбекистонда 20 йилдан ортиқ фаолият юритаётганимиздан ва маҳаллий ҳамжамиятнинг бир қисмига айланганимиздан фахрланамиз. Айниқса, Chevrolet автомобиллари мамлакатда кенг тарқалганидан мамнунман. Биз Ўзбекистон ва бутун Марказий Осиё билан ҳамкорликни давом эттиришга, ўсиш ва тараққиёт йўлимизни биргаликда олға силжишга интиламиз. Ўсиш, ишонч ва имкониятлар маркази сифатида Ўзбекистон биз учун алоҳида аҳамиятга эга», — деди у.
UzAuto Motors’даги вазият
Chevrolet автомобиллари UzAuto Motors базасида ишлаб чиқарилади. Савдо ҳажмининг пасайиши фонида компаниянинг январь-сентябрь ойларидаги даромади 12,8% ёки 5,2 трлн сўмга қисқарди — 35,4 трлн сўм ($2,93 млрд). Соф фойда 3,6% камайди — 2,66 трлн сўм ($220 млн).
Шу билан бирга, биринчи яримйиллик якунларига кўра, соф фойданинг пасайиши 27,5 фоизни ташкил этган бўлса, учинчи чоракда (июль-сентябрь) компания молиявий кўрсаткичларини кескин яхшилашга эришди.
2025 йилнинг учинчи чорагида UzAuto Motors 1,27 трлн сўм соф фойда олди, бу ўтган йилнинг шу даврига нисбатан 426 млрд сўмга (+50,7%) кўп. Даромад эса 17,2% қисқарди — 17,15 дан 14,19 трлн сўмга. Бироқ сотиш қиймати янада сезиларли даражада пасайди (-21,5%), бу ялпи маржани ўтган йилдаги 15,3% дан 19,6% гача ошириш имконини берди.
Молиявий тушумлар, биринчи навбатда, ижобий курс фарқлари ҳисобига 3 баравар ортди — 266 млрд сўмдан 842 млрд сўмга.
Эътиборлиси, фойда солиғи 23% камайиб, 263 млрд сўмни ташкил этди.
Сотувлар ҳажмининг 26 000 донага — 245,1 мингтагача қисқариши ҳисобига Chevrolet’нинг расмий бозордаги улуши ўтган йилнинг шу даврига нисбатан 89,4% дан 82,7% га камайди. Деярли барча моделларда сотувлар камайди: бозор етакчиси Cobalt (-4,2%), Tracker (-12%) ва Onix (-37,8%).
ADM Jizzakh’нинг улуши 6,5 фоиздан 11,1 фоизга, савдо ҳажми эса 19 766 дан 32 987 тага ошди. Завод KIA, Chery ва Haval автомобилларини етказиб беради.
BYD бир йил олдинги 3,8% га нисбатан 5,7% бозор улушини эгалламоқда, сотувлар 11,580 дан 16,846 гача ўсди.
UzAuto Motors бош директори Янош Ковач аввалроқ стратегияни ўзгартириш зарурлигини таъкидлаб, саккизта янги модель, жумладан, Cobalt’нинг янгиланган версияси ишлаб чиқилишини эълон қилганди.
Эслатиб ўтамиз, 3 ноябрь куни UzAuto Motors Chevrolet Cobalt автомобилларининг янги партияси бўйича шартнома тузиш ишларини якунлади. 2,5 соат ичида компания ушбу моделнинг 100 000 тасига олдиндан буюртма олди. Нархлар 146,5 млн сўмдан (тахминан 12 100 доллар) бошланади, яъни компания Cobalt ишлаб чиқариш учун 1,2 млрд долларлик буюртма олган.