БМТ Хавфсизлик кенгаши Сурия муваққат президенти Аҳмад ал-Шараа ва Сурия ички ишлар вазири Анас Хаттобдан санкцияларни олиб ташлашни қўллаб-қувватлади, деб хабар бермоқда Reuters. Тегишли резолюция лойиҳаси АҚШ томонидан тайёрланган.
Резолюцияни 14 мамлакат, жумладан, Хавфсизлик кенгашининг доимий аъзоларидан Россия қўллаб-қувватлаган бўлса, Хитой овоз беришда бетараф қолди.
«Менимча, у жуда яхши ишлаяпти», — деди Трамп Шараа ҳақида гапираркан. «Бу қийин ҳудуд, у ҳам қатъиятли оғир одам, лекин мен у билан жуда яхши муносабат ўрнатдим. Ва Сурия билан кўп нарсаларга эришилди». «Биз Сурияга курашиш имкониятини бериш учун уларга қарши санкцияларни бекор қилдик», — деди у Вашингтондаги журналистларга.
АҚШ Аҳмад аш-Шараанинг Вашингтонга дастлабки ташрифи олдидан БМТ Хавфсизлик кенгашига Суриянинг янги ҳокимиятидан санкцияларни олиб ташлаш тўғрисидаги резолюция лойиҳасини киритганди. Сурия президенти 10 ноябрь, душанба куни АҚШ президенти Дональд Трамп билан учрашиши кутилмоқда.
Вашингтон бир неча ойдан бери 15 аъзодан иборат Хавфсизлик кенгашини Сурияга нисбатан санкцияларни юмшатишга чақириб келади. Трамп май ойида АҚШ сиёсатидаги катта ўзгаришни эълон қилганди, ўшанда у Сурияга нисбатан АҚШ санкцияларини бекор қилишини айтган.
Июнь ойи сўнгида эса Трамп Сурияга қарши 2004 йилда киритилган санкцияларни бекор қилиш тўғрисидаги фармонни имзолаган. Ҳужжат амалдаги экспорт назорати чораларини юмшатишга рухсат беради, «Сурияни халқаро ҳамжамият учун очади». Собиқ президент Башар Асад ва унинг сафдошларига нисбатан чекловлар ўз кучида қолган.
Шунингдек, май охирида Европа Иттифоқи Суриядан барча иқтисодий, шунингдек, мамлакатнинг 24 та тузилмасига нисбатан қўйилган санкцияларни бекор қилган. Хавфсизлик масалалари билан боғлиқ бўлганлари бундан мустасно. Башар Асад режимига алоқадорларга нисбатан санкциялар эса 2026 йил 1 июнгача узайтирилган.
Аҳмад аш-Шараа 2024 йил декабрь ойи бошида Дамашққа қуролли мухолифат гуруҳлари кириб келганида Башар Асад режими қулаганидан сўнг Суриянинг ўтиш даври президенти лавозимини эгаллаган.