Ўзбекистонда биринчи Burger King ресторани йил охиригача очилиши мумкин. Бу ҳақда International Beverages Tashkent салқин ичимликлар ишлаб чиқарувчи корхонаси асосчиси Шуҳрат Эргашев «Ўзбекистон 24» каналига берган интервьюсида маълум қилди.
Унинг сўзларига кўра, Ўзбекистонга халқаро брендларнинг кириб келиши мамлакатга бўлган ишончни оширмоқда.
«Яқин орада мен бу ҳақда гапиргандим — бизлар Burger King деган компанияни олиб келдик. Бу компания томонидан Ўзбекистонга билдирилган ишонч. Кўп чет эл компаниялари Ўзбекистонга кирган пайтда улар бу ерда McDonald’s, Burger King ёки бошқа компаниялар борми-йўқми — шунга қарайди», — деди тадбиркор.
Унинг айтишича, ресторан Тошкентда бир — бир ярим ой ичида ишга туширилади ва аста-секинлик билан Ўзбекистоннинг барча ҳудудларида ҳам очилади.
«Бу жуда катта дунёвий конгломерат, ҳозир уни Ўзбекистонга олиб келдик. Яқин орада, бир ой, бир ярим ой ичида ишга туширилади ва йилдан-йилга бу ресторанларни Ўзбекистон бўйича ҳамма жойда очамиз», — деди Эргашев.
2021 йил июль ойида Spot Burger King Ўзбекистон бозорига киришни режалаштираётгани ҳақида хабар берган эди. Burger King Uzbekistan франшизаси тармоқнинг Москвада жойлашган русча ваколатхонасига алоқадор компанияга тегишли эди.
2025 йилнинг март ойида International Beverages Tashkent’нинг 0,1 фоизига эгалик қилувчи Қозоғистоннинг Holten Group компанияси «Верный Капитал» компаниялар гуруҳидан Burger King Kazakhstan франшизасини сотиб олгани маълум бўлди.
18 апрель куни президент раислигида ўтказилган йиғилишда International Beverages Tashkent салқин ичимликлар ишлаб чиқарувчи корхонаси асосчиси Шуҳрат Эргашев Burger King фастфуд ресторанлари тармоғи Ўзбекистон бозорига киришга тайёрланаётганини, икки-уч ой ичида илк ресторанлар очилишини маълум қилди.
Сентябрда эса Spot ўз манбасига таяниб, ресторанларнинг очилиши тахминан шу йилнинг ноябрь-декабрь ойларига мўлжаллангани, аммо қурилиш ишлари давом этаётгани сабабли аниқ сана ҳали белгиланмагани ҳақида хабар берди. Шунингдек, манбага кўра, Тошкентда учта нуқтани очиш режалаштирилган: Tashkent City Mall савдо мажмуасида, Seoul Mun ҳудудида ва «Беруний» метро бекати яқинида.