Akfa Group турк компанияси билан ҳамкорликда АҚШнинг Кентукки штатида йирик ишлаб чиқариш мажмуасини қуришни бошлади. Бу ҳақда гуруҳ асосчиси Жаҳонгир Ортиқхўжаев «Ўзбекистон 24» телеканалининг «Менимча» кўрсатувига интервьюсида маълум қилди.
Унинг сўзларига кўра, янги заводда алюминий маҳсулотлари, автомобиль бутловчи қисмлари, қуёш батареялари ва деразалар учун эҳтиёт қисмлар ишлаб чиқарилади.
«Бу ерда алюминий маҳсулотлари, автомобилларга эҳтиёт қисмлар, қуёш панелларига эҳтиёт қисмлар, ойналарга эҳтиёт қисмлар ишлаб чиқарадиган фабрикани бошладик. Худо хоҳласа, биринчи йили 105 миллион доллар инвестиция жалб қилинмоқда. Ундан ташқари, умумий 600 миллион долларлик инвестиция жалб қилинмоқда Америка Қўшма Штатларидаги фабрика учун», — дейди тадбиркор.
Жаҳонгир Ортиқхўжаев 2018—2023 йилларда Тошкент шаҳри ҳокими лавозимида ишлаган. Ҳозирда O’zgazloyiha, J-United Group, Ekzotella, Akfa Logistics, Tourism And Entertainment Group, Akfa Engineering And Management, Greensun Element Group, Akfa Dream World, Artel Electronics, Build Infinity, Akfa Accessories, Primary Enterprise, High Level Investment, Infinity Confidence, Akfa Aluminium, Dreams Island, Adw-International Congress Hall, Osten Technologies, Jahon School Maktabi ва бошқа компаниялар асосчиси сифатида қайд этилган. Ушбу МЧЖларнинг баъзилари бошқа компанияларга эга.
2024 йил декабрида президент билан учрашувда тадбиркор «ягона экотизим доирасида» пойтахтда 1200 ўринли олтита янги меҳмонхона очиш режасини маълум қилганди. Шунингдек, у Кливленддаги Америка тиббиёт маркази билан ҳамкорликда йирик клиника қуришни режалаштирган.