Ўзбекистоннинг олтин-валюта захиралари 1 ноябрь куни 59,3 миллиард долларга етди, дейилади Марказий банк маълумотларида. Бу 2013 йилда статистик маълумотлар юритила бошланганидан бери рекорд даражадаги кўрсаткич ҳисобланади.
Октябрь ойи охирида захиралар 4,34 млрд долларга (+7,9%) ошди. Йил бошидан буён ўсиш 18,1 млрд долларни (+44%) ташкил этди.
Олтин яна бир бор ўсишга катта ҳисса қўшди, унинг жаҳон бозоридаги нархи октябрь ойида бир унция учун 4400 долларгача кўтарилди. Регулятор маълумотларига кўра, олтин нархининг 3806,55 доллардан 4013,20 долларгача (5,4 фоизга ўсиш) ўсишининг ойлик таъсири 2,5 млрд долларни ташкил этган (сентябрда — 4,6 млрд доллар).
Йил бошидан буён қимматбаҳо метал АҚШ президенти Дональд Трампнинг савдо сиёсати, кейин эса АҚШ Федерал захира тизими (ФЗТ) томонидан ставканинг пасайтирилиши кутилаётгани, шунингдек, Трампнинг ФЗТ мустақиллигига тажовуз қилиши фонида энг даромадли активлардан бирига айланди.
Захирадаги қимматбаҳо металлнинг физик ҳажми 300 минг трой унцияга (9,33 тонна) ошди — 11,92 млн унциягача (370,7 тонна). Йил бошидан буён унинг захиралари тахминан 11,8 тоннага камайди.
Натижада олтин заҳиралари қиймати 3,6 млрд долларга ошиб, 47,8 млрд долларга етди. Бу ҳозиргача қайд этилган энг юқори кўрсаткич. Олтин мамлакат жами захираларининг 80,6 фоизини ташкил қилади.
Захираларнинг валюта қисми 731,4 млн долларга ошиб, 10,18 млрд долларга етди.
Захирадаги қимматли қоғозлар ҳажми деярли ўзгармади — 1,02 млрд долларни ташкил этди (+3,6 млн доллар).
Марказий банкнинг олтин-валюта захиралари миллий иқтисодиёт ва молия тизимининг барқарорлигини таъминлашда асосий ўрин тутади. Улардан миллий валюта курсининг кескин тебранишида унинг курсига таъсир кўрсатиш орқали барқарорлигини қўллаб-қувватлаш, кредиторларга ташқи қарзни тўлаш, инқирозли вазиятларда импортни қоплаш, ташқи иқтисодий рисклардан ҳимоя қилиш учун фойдаланиш мумкин.
Захиралар экспорт қилинадиган товарлар нархининг кескин ўзгариши, халқаро санкциялар, глобал молиявий инқирозлар ёки валюта бозорларидаги тебранишлар каби ташқи таъсирларга қарши ўзига хос «хавфсизлик ёстиғи» вазифасини бажаради.