Жанубий Корея махсус прокурори 10 ноябрь куни собиқ президент Юн Сок Ёлга ўтган йили қисқа муддатли ҳарбий ҳолат жорий этгани билан боғлиқ иш бўйича қўшимча айбловлар эълон қилди, у ҳокимиятни суиистеъмол қилиш ва душман давлатга кўмаклашишни назарда тутади. Бу ҳақда Yonhap ёзмоқда.
Айблов версиясига кўра, Юн Сок Ёль ҳарбий қўмондонлик билан биргаликда Шимолий Корея ҳудудида жавоб ҳаракатларини қўзғатиш ва уларни ҳарбий ҳолат жорий этиш учун баҳона сифатида қўллаш мақсадида учувчисиз учиш аппаратларидан фойдаланган ҳолда махфий операция ўтказишни буюрган.
Бундай айблов ҳарбий контрразведка қўмондонлигининг собиқ раҳбари Ё Ин-Хённинг мобил телефонидан топилган далилларга асосланади. Унда Шимолий Кореяга қарши эҳтимолий ҳаракатлар, жумладан, «дронлар» ва «аниқ мўлжалли зарба» каби иборалар мавжуд бўлган.
КХДР ўшанда Жанубий Кореядан келган дронлар Пхеньян узра варақалар тарқатганини маълум қилган ва қулаган дрон қолдиқлари суратларини эълон қилганди. Жанубий Корея махсус прокурори жамоаси дронрларнинг юборилиши КХДРга ҳарбий сирларнинг сизиб чиқишига олиб келган, деб ҳисобламоқда.
Шунингдек, собиқ мудофаа вазири Ким Ён Хён ва ҳарбий контрразведка қўмондонлигининг собиқ раҳбари Ё Ин-Хёнга ҳам айблов қўйилган. Бундан ташқари, дрон операциялари қўмондонлиги раҳбари Ким Ён Дэ хизмат вазифаларини бажаришга тўсқинлик қилиш ва сохта ҳужжатлар тузишга ундашда айбланмоқда, бироқ у ҳибсга олинмаган.
Чапдан ўнгга: собиқ мудофаа вазири Ким Ёнг Хён, ҳарбий контрразведка қўмондонлигининг собиқ раҳбари Ё Ин-Хён ва дрон операциялари қўмондони Ким Ён Дэ. (Yonhap).
Бу учлик Юннинг ҳарбий ҳолат эълон қилишини оқлаш учун мамлакатда кескинлик яратиш мақсадида тил бириктирган, дейди прокурор.
- Президент Юн Сок Ёль 2024 йил 3 декабрь куни кечқурун Жанубий Кореяда ҳарбий ҳолат эълон қилганди. У буни конституциявий тартибни «коммунистик кучлар»дан ҳимоя қилиш зарурати билан изоҳлаган. Унинг сўзларига кўра, у бундай чорани мухолифат ҳаракатлари туфайли қўллаган.
- Ўша кечаси парламент президент фармонини бекор қилиш учун овоз берган, шундан сўнг Юн уни бекор қилишга рози бўлган. Кейинги бир неча кун ичида президент ва яна бир қатор мансабдор шахсларга нисбатан тергов бошланган.
- 14 декабрь куни Жанубий Корея парламенти иккинчи уринишда Юнга импичментни қўллаб-қувватлаган. Унинг президентлик ваколати тўхтатилган.
- Январь охирида Жанубий Корея прокуратураси Юн Сок Ёлга исёнга раҳбарлик қилишда айблов қўйганди. Шунингдек, у асосий сиёсий арбобларни қамоққа олишни режалаштирганликда ҳам айбланган.
- Май ойида Жанубий Корея прокуратураси собиқ президентни ҳарбий ҳолат жорий этишга уринишда ваколатини суиистеъмол қилганликда айблаган. Бу сиёсатчига қўйилган иккинчи айб бўлганди, у қўзғолон иши билан ҳам юзлашган.
- Июль ойида эса Юн Сок Ёль ҳарбий ҳолат жорий этишга доир айбловлар билан иккинчи марта ҳибсга олинган. Биринчи марта у январь ойида Сеулдаги қароргоҳида ҳибсга олинган бўлса, икки ой ўтгач, мартда суд ҳибсни техник сабабларга кўра бекор қилганди ва Юн ҳибсдан озод қилинганди, аммо унга қарши тергов давом этаверган. Прокурорлар Ёл озодликда экан, далилларни йўқ қилишга уриниши ва ишга оид шахслар билан учрашишидан хавотир билдирганди.
