Ўзбекистон энергетика вазири Жўрабек Мирзамаҳмудов «Ўзбекистон 24» телеканалига берган интервьюсида ёқилғи-энергетика соҳасида АҚШнинг қатор етакчи компаниялари билан ҳамкорликни кенгайтириш режалари ҳақида сўзлаб берди.
Унинг сўзларига кўра, АҚШдаги тадбирларда йирик инвесторлар билан бир қаторда автоматлаштириш ва энергетика соҳасидаги технологик ҳамкорлар ҳам иштирок этган.
Вазирнинг таъкидлашича, автоматлаштириш соҳасидаги жаҳон етакчиларидан бири бўлган Honeywell компанияси билан саноат ва энергетика тармоқларида бир нечта лойиҳалар амалга оширилиши режалаштирилган.
Шунингдек, президентнинг технологик жараёнларда сунъий интеллектни кенг жорий этиш бўйича топшириқларини амалга ошириш доирасида қўшма семинар ўтказиш ҳам режалаштирилмоқда.
Вазирнинг айтишича, устувор ҳамкорлар қаторида Schlumberger — нефть-сервис технологиялари соҳасидаги жаҳон етакчи компанияларидан бири ҳам бор.
«Шунингдек, бурғилаш соҳасидаги етакчи компания Schlumberger билан ҳамкорликни фаол ривожлантириш режалаштирилган. Компания биз билан биргаликда бурғилаш, замонавий усуллар ва технологияларни жорий этиш йўналишида, аввало Устюрт ҳудудида иш олиб боради», — деди вазир.
Бундан ташқари, Ўзбекистон Caterpillar компанияси, аниқроғи унинг Solar Turbines бўлинмаси билан музокаралар олиб бормоқда. У газ ҳайдаш агрегатлари, двигателлар ва когенерация ускуналарини ишлаб чиқаради.
Шунингдек, АҚШда электр двигателлари ишлаб чиқарадиган Siemens Energy компанияси билан газ-транспорт тизимини электрлаштириш масаласи муҳокама қилинмоқда.
«Америкада электр двигателлари ишлаб чиқарувчи Siemens Energy билан биз газ-транспорт тизимини электрлаштириш ва табиий газда ишлайдиган двигателларни электр двигателларига алмаштириш имкониятини кўриб чиқмоқдамиз», — дея хулоса қилди Жўрабек Мирзамаҳмудов.
Эслатиб ўтамиз, Шавкат Мирзиёев 6 ноябрь куни Вашингтон шаҳрида АҚШнинг етакчи компаниялари, инвестиция фондлари ва молиявий институтлари раҳбарлари билан учрашув ўтказди. Давлат раҳбари ўз нутқида Ўзбекистон билан АҚШ ўртасидаги стратегик шерикликнинг асосий йўналишларини кўрсатиб ўтди. У АҚШ билан ҳамкорликнинг тўрт устувор йўналиши сифатида энергетика, стратегик хомашё, логистика ва IT соҳасини тилга олди.
Ўзбекистон, шунингдек, АҚШдан кичик ядровий реакторлар сотиб олишни режалаштирмоқда, Американинг Air Products компанияси эса мамлакатда метанол ишлаб чиқариш заводи қурилишига 3 миллиард долларгача сармоя киритиш ниятида.