Тошкент шаҳрида чиқинди хизматидан қарзи бўлган 19 мингта абонент электр учун тўлов қилишни чеклаш ҳақидаги огоҳлантиришдан сўнг жами 1 млрд 657 млн сўмлик қарзини тўлаган. Бу Чиқиндиларни бошқариш ва циркуляр иқтисодиётни ривожлантириш агентлиги маълумотларидан келиб чиқади.

Агентлик қайд этишича, 5 ноябрь куни Тошкент шаҳри бўйича чиқинди хизматларидан юзага келган қарийб 2 млрд 239 млн сўм дебитор қарздорлик учун жами 25 121 та абонент «Ҳудудий электр тармоқлари»нинг «2100» қисқа рақамидан SMS хабарнома орқали огоҳлантирилган.

Огоҳлантириш юборилганидан кейин 5 кун ичида қарздорликни бартараф этмаган 6 мингта абонентнинг электр энергияси учун тўлов қилиш имкониятига 10 ноябрдан вақтинча чеклов жорий этилган.

Агентлик айни пайтда Тошкент шаҳри кесимида чиқинди хизматларидан жами 582 млн сўмдан ортиқ дебитор қарздорлиги қолганини маълум қилган. Бундан келиб чиқадики, 5 кун ичида 19 мингта абонент жами 1 млрд 657 млн сўм қарздорлигини ёпган.

Эслатиб ўтамиз, тегишли норма жорий этилган қонун Қонунчилик палатаси томонидан 2024 йил 24 декабрда қабул қилинган, Сенат томонидан 2025 йил 21 февралда маъқулланган.

Унга кўра, қаттиқ маиший чиқиндиларни тўплаш ва олиб чиқиш хизматлари учун мажбурий тўловлар бўйича қарздорлиги мавжуд бўлган истеъмолчилар қисқа хабар (SMS) орқали хабардор қилинганидан кейин мазкур қарздорлик бартараф этилгунига қадар улардан электр энергияси учун тўловларни қабул қилишни вақтинчалик чекланади.

Бунда қаттиқ маиший чиқиндиларни тўплаш ва олиб чиқиш хизматларини кўрсатувчи ташкилотлар қаттиқ маиший чиқиндиларни тўплаш ва олиб чиқиш хизматлари учун тўловларни ҳисоб-китоб қилишнинг ишончлилиги ҳамда тўғрилиги учун жавобгар бўлади, шунингдек мазкур талаблар бузилган ҳолларда, истеъмолчига етказилган зарарнинг ўрнини қоплайди.

Электр энергияси учун тўловларни қабул қилишни вақтинчалик чеклови чиқинди қарздорлиги тўлангандан сўнг автоматик равишда бекор қилинади. Қарздорликни қоплаш учун 5 кун вақт берилади. Янги тартиб эски қарзларга тааллуқли эмас — чекловлар фақат 2025 йил 1 июлдан кейин юзага келадиган қарзларга нисбатан қўлланади.