Ўзбекистонда иш вақтидан ташқари ишнинг давомийлиги йилига 120 соатдан ошмаслиги талаби бекор қилинди. Бу 11 ноябрда қабул қилинган қонунда [ЎРҚ-1095-сон] кўзда тутилган бўлиб, у билан Ўзбекистон Республикасининг айрим қонун ҳужжатларига ўзгартириш ва қўшимчалар киритилди. Бу ҳақда Адлия вазирлигининг «Ҳуқуқий ахборот» Telegram каналида хабар берилди.
Қонун билан қонун ҳужжатларига иш вақтидан ташқари иш учун ҳақ тўлаш тизимини такомиллаштириш, Миграция агентлигининг ваколатларини аниқлаштириш, хусусий бандлик агентликларининг ҳуқуқ ва мажбуриятларини кенгайтиришга қаратилган ўзгартириш ва қўшимчалар киритилди.
Меҳнат кодексига киритилган ўзгартиришларга кўра, иш вақтидан ташқари ишнинг давомийлиги йилига 120 соатдан ошмаслиги тўғрисидаги талаб чиқариб ташланди.
Шунингдек, иш вақтидан ташқари ишнинг 1 кундаги биринчи 2 соати учун камида 1,5 ҳисса миқдорида, 2 соатдан ортиқ қисми учун камида 2 ҳисса миқдорида ҳақ тўланиши белгиланди. Аввалги нормага кўра, иш вақтидан ташқари иш учун (барча соатда) камида 2 ҳисса миқдорида ҳақ тўланиши белгиланганди.
Бундан ташқари, ҳужжатга кўра, хусусий бандлик агентликларига қуйидаги ҳуқуқлар берилди:
- иш қидираётган шахсларни касб-ҳунар ва чет тилларга ўқитиш бўйича ўқув курсларини белгиланган тартибда ташкил қилиш, шунингдек ушбу жараёнга чет эллик иш берувчиларни жалб этиш;
- захира қилинадиган маблағларни тижорат банкларидаги депозитларга жойлаштириш ҳисобидан олинадиган фоиз даромадларини мустақил равишда тасарруф этиш.
2023 йилда «Юксалиш» умуммиллий ҳаракати давлат хизматчилари ўртасида уларнинг иш жойларида иш вақтига қанчалик риоя этилишига оид аноним сўровнома ўтказиб, уларнинг 57,3 фоизи иш вақтидан ташқари ишларга жалб этилгани, 81,7 фоизига бунинг учун қўшимча ҳақ тўланмаганини аниқлаган эди.
Айни пайтда Меҳнат кодексининг 262-моддасида ходимга иш вақтидан ташқари иш учун камида икки ҳисса миқдорида ҳақ тўланиши белгилаб қўйилган.
