Ўзбекистонлик боксчи ва Олимпия чемпиони Лазизбек Муллажонов допинг-тестнинг ижобий натижаси сабаб мусобақаларда иштирок этишдан уч йилга четлатилди. Бу ҳақда World Boxing федерациясининг мустақил антидопинг дастури учун масъул бўлган Халқаро тест агентлиги (ITA) хабар берди.
Ташкилот маълумотларига кўра, спортчи мусобақадан ташқари олинган намуна метастерон метаболитларига ижобий натижа кўрсатганидан сўнг дисквалификацияга розилик билдирган. Бу — мушакларнинг тез ўсиши, куч ва чидамлиликнинг ошишига ёрдам берадиган синтетик анаболик андроген стероид ҳисобланади. У мусобақа пайтида ҳам, мусобақадан ташқарида ҳам тақиқланган.
Намуна жорий йил 11 июнь куни мусобақадан ташқари допинг назорати доирасида олинган. Июль охирида Муллажонов вақтинча дисквалификация қилинган эди.
ITA хабарига кўра, боксчи қоидалар бузилганини рад этмаган. World Boxing’нинг антидопинг қоидаларига мувофиқ, унинг иқрор бўлиши стандарт тўрт йиллик четлатиш муддатини бир йилга қисқартириш имконини берди. Шу тариқа дисквалификация 2025 йил 22 июлдан 2028 йил 21 июлгача амалда бўлади.
Спортчининг 2025 йил 11 июндан (намуна топширилган сана) 2025 йил 22 июлгача (вақтинчалик четлатилган сана) бўлган натижалари бекор қилинган.
Эслатиб ўтамиз, август ойи бошларида Ўзбекистон Бокс федерацияси Лазизбек Муллажоновнинг допинг тести ижобий чиқиши соч экиш операциясидан кейин ёзиб берилган дорилар билан боғлиқ бўлиши мумкинлигини маълум қилганди.
Лазизбек Муллажонов -92 кг вазн тоифасида Париж-2024 Олимпиадаси ғолиби. Шунингдек, у 2021 йилги ҳарбийлар ўртасидаги жаҳон чемпиони ҳисобланади. 2022 йилда Иорданияда бўлиб ўтган қитъа чемпионатида супер оғир вазн тоифасида олтин медални қўлга киритди. Тошкентда бўлиб ўтган 2023 йилги жаҳон чемпионатининг бронза медали совриндори.
Аввалроқ таэквондочи Улуғбек Рашитов антидопинг қоидаларини бузгани учун 2 йилга дисквалификация қилинганди. У бир йил ичида уч марта ўз жойлашуви ҳақидаги маълумотларни тақдим этиш талабларини бузди ва қарорга эътироз билдирмасликка қарор қилди. Икки карра Олимпиада чемпионининг таъкидлашича, унинг дисквалификацияси тақиқланган моддаларни истеъмол қилиш билан эмас, балки жойлашув маълумотларини тақдим этиш тартибини бузиш билан боғлиқ. Спортчи 2028-йилги Олимпиадада қатнашишга умид қилмоқда.
