Футбол бўйича Ўзбекистон миллий терма жамоаси ноябрь ойидаги ФИФА кунлари доирасида Дубайда Al Ain International Cup халқаро ўртоқлик турнирида иштирокини бошлади ва илк баҳсда Мисрни 0:2 ҳисобида мағлуб этди.
«Ҳазза Бин Зайд» стадионидаги (стадион сиғими — 25 минг, ушбу ўйинни 6200 мухлис кузатди) учрашувнинг илк дақиқаларидаёқ ҳисоб очилди. 3-дақиқада ўзбекистонликларнинг ўнг қанотдан уюштирган ҳужуми аввалига рақиб футболчилари тарафидан қайтарилди, бироқ сўнгра тўп олдириб қўйилгач, ҳужумчи Остон Ўрунов мисрлик 4−5 футболчини алдаб ўтиб, гол урди.
Биринчи бўлимнинг сўнгги дақиқаларига келиб, Ўрунов яна ўзини кўрсатди ва ҳисобни 0:2 кўринишига келтирди. У ўткир бурчакда дарвозабон билан яккама-якка келди ва уни алдаб ўтиб, зарба йўллади, тўп рақиб ўйинчисига тегиб, дарвоза тўридан жой олди.
Ўйиндаги иккала голга ҳам Ўрунов муаллифлик қилди.
Ушбу мини турнирда Ўзбекистон ва Мисрдан ташқари Жаҳон чемпионати йўлланмасини қўлга киритган Эрон ва Кабо Верде терма жамоалари ҳам иштирок этмоқда. Нариги ўйинда Эрон Кабо Верде билан билан голсиз дуранг қайд этди ва пенальтилар сериясида 5:4 ҳисобида ғалаба қозонди.
Энди Ўзбекистон ва Эрон иштирокидаги ҳал қилувчи баҳс, яъни финал 18 ноябрь куни бўлиб ўтади.
Миср ҳамда Кабо Верде бўлса учинчи ўрин учун майдонга тушади (17 ноябрь).
ФИФА рейтингида Эрон 21-ўринда бормоқда, Миср эса 32-поғонада (+3). Ўзбекистон, хабар қилинганидек, рейтингда бир поғона пастлаб, 55-ўринга тушган. Кабо Верде 71-ўриндан жой олган (-1).
Фото
