АҚШ президенти Дональд Трамп «Panorama» дастури учун тайёрланган ҳужжатли фильмда унинг 2021 йил 6 январдаги нутқи нотўғри таҳрир қилингани учун Би-би-сига қарши судга даъво аризаси киритилишини билдирди.
Трампнинг айтишича, Би-би-си нутқининг икки алоҳида қисмини бирлаштириб, воқеаларни ҳаққоний акс эттирмаган.
Ўтган ҳафта Би-би-си ушбу монтаж расман узр сўраганди. Аммо, компенсация тўлашдан ҳамда эфирда кўрсатилган ҳолатни тўлиқ инкор қилишдан бош тортди.
Шундан сўнг Трампнинг адвокатлари корпорацияни 1 миллиард долларлик даъво билан судга беришини айтди. Улар эфирдаги маълумотни рад этиш, расмий узр ҳамда компенсация талаб қилишган.
«Биз уларни судга берамиз ва бир миллиарддан беш миллиард долларгача талаб қиламиз — катта эҳтимол билан келаси ҳафта», – деди Трамп журналистларга жума куни кечқурун президентлик самолётида.
Маълумот учун, мазкур ҳужжатли фильмда Трампнинг 2021 йил 6 январдаги Капитолий воқеаларидан олдинги нутқидан икки турли парчани монтаж қилиш орқали бирга кўрсатилган. Трамп буни «манипуляция» ва «қасддан бузиб кўрсатиш» деб баҳолаган. Би-би-си эса техник хатони тан олган, лекин моддий жавобгарликни ўз зиммасига олмаган.