Коррупцияга қарши курашиш агентлиги томонидан «SurxondaryoQurilishInvest» давлат муассасаси (ДМ) буюртмаси асосида ўтказилган давлат харидида қонун бузилиши ҳолати аниқланди, деб хабар бермоқда агентлик.
Хусусан, ДМ Бойсун туманидаги «Ҳонгаронсой» сел-сув омборидан насос станцияси ва сув узатиш қувурларини қуриш орқали экин майдонларининг сув таъминотини яхшилаш бўйича бошланғич нархи 38,5 млрд сўмлик тендер эълон қилган.
Харид комиссиясининг баённомасига кўра, ушбу давлат харидида 36,5 млрд сўмлик таклиф билан «Д.Й.Т.» МЧЖ танлов ғолиби, 38,5 млрд сўмлик таклиф билан «М.И.Т.» ХК захирадаги ғолиб деб топилган.
Аниқланишича, тендернинг яна бир иштирокчиси — «Ф.» МЧЖнинг солиқ ҳисобварағига ноқонуний аралашув йўли билан солиқдан қарздорлик мавжудлиги ҳақида сохта маълумот киритилган. Оқибатда жамият «Шаффоф қурилиш» махсус ахборот платформаси орқали тендер жараёнидан асоссиз равишда четлаштирилган.
«Агентлик томонидан кўрилган чоралар натижасида мазкур хариднинг бекор қилиниши таъминланди», — дейди Антикоррупция агентлиги.
Шунингдек, ҳолат юзасидан ҳуқуқни муҳофаза қилиш органлари томонидан тегишли ҳуқуқий баҳо берилмоқда.
Коррупцияга дуч келинганда агентликнинг Call маркази — 1253 орқали мурожаат қилиш сўралди.
