5−7 декабрь кунлари Тошкентдаги Xamar арт-галереясида «Қўғирчоқ уйи» коллекцияли қўғирчоқлар ва муаллифлик ўйинчоқларининг 3-қишки фестивали бўлиб ўтади. Анъанага кўра, уни 2023 йилда пойтахтда машҳур усталар Оксана Середюк ва Ольга Томлинг ташаббуси билан ташкил топган шу номдаги ижодий ҳамжамият ўтказади.
«Ҳар бир янги фестиваль аввалгисига қараганда каттароқ масштабда бўлади. Қўғирчоқ усталарининг маҳорати ошиб бормоқда, янги тематик асарлар пайдо бўлмоқда ва иштирокчилар доираси кенгайиб, қўғирчоқлар оламига тобора кўпроқ ижодкорларни чорламоқда», — дейди Ольга Томлинг.
Бўлажак фестивалда ўзбекистонлик 22 нафар қўғирчоқ устаси ўз ишларини тақдим этади, улар орасида Марина Вашенко, Ирина Крашенинникова, Лия Кевхаянц, Маргарита Полякова, Анна Кравченко ва бошқалар бор. Уларга Қозоғистондан қўғирчоқ усталари — Asia Dolls ижодий ҳамжамияти аъзолари қўшилади.
Россия ва Европа қўғирчоқ усталарининг эксклюзив тўпламини тошкентлик қўғирчоқ ишқибози Наталия Шутова томонидан асос солинган D’Ameli Art Doll Gallery хусусий галереяси тақдим этади.
Ташриф буюрувчилар учун зодиакал юлдуз туркумларидан илҳомланган қўғирчоқлар, байрамона арчалар тасвирланган Янги йил композициялари ва россиялик рассом Алёна Абрамованинг маҳорат дарси иштирокчиларининг асарлари намойиш этилади.
Ёш ташриф буюрувчилар учун ташкилотчилар интерактив зоналар тайёрламоқда. Янги йил печеньесига нақш солиш ва ўйинчоқ арча ясаш бўйича маҳорат дарслари болаларга ижод қувончини ҳадя этади. Барча хоҳловчилар байрам фотозонаси ёнида суратга тушишлари ва «Мўъжизалар дўкони»дан сувенирлар, совғалар ёки керамик арча безакларини харид қилишлари мумкин.
«Биз учун фестивалда доимий меҳмонларни ҳам, биринчи марта келаётганларни ҳам кўриш бирдек муҳим. Қўғирчоқ санъати ҳис-туйғуларни уйғотади ва биз унинг қандай намоён бўлаётганини кўришдан доимо мамнунмиз», — дейди Ольга Томлинг.
«Қўғирчоқ уйи»нинг эшиклари соат 11:00 дан 19:00 гача очиқ. Фестивалга кириш бепул.