2026 йил 1 январдан хотин-қизларнинг тадбиркорлик лойиҳаларини молиялаштиришга 24 фоизлик (Марказий банк фоиз ставкаси + 10 фоиз пункт) имтиёзли ставкада БҲМнинг 25 минг бараваригача ёки 10,3 млрд сўмгача кредит ажратилади. Бу ҳақда Адлия вазирлиги ахборот хизмати хабар қилди.
3 декабрда хотин-қизларнинг касб-ҳунар ўрганиш имкониятларини кенгайтириш ҳамда тадбиркорлик лойиҳаларини молиявий қўллаб-қувватлашга қаратилган «Хотин-қизларни қўллаб-қувватлашга оид қўшимча чора-тадбирлар тўғрисида»ги президент фармони қабул қилинди.
Фармонга мувофиқ, маҳаллаларда хотин-қизлар бандлигини таъминлаш ва саломатлигини мустаҳкамлаш марказлари фаолиятини кенгайтириш кўзда тутилган. Марказлар маҳаллий ҳокимликлари томонидан ташкил этилиб, тегишли мутасадди ташкилотлар томонидан тикувчилик, қандолатчилик, фитнес, шейпинг, хотин-қизларни касбга ўқитиш каби фаолиятларни ташкил этиш учун ижарага берилади.
2026−2027 йилларда «HAMROH» хотин-қизлар тадбиркорлигини қўллаб-қувватлаш компанияси 6 минг нафар хотин-қизларнинг тадбиркорлик лойиҳаларини молиявий қўллаб-қувватлашга 2 трлн сўм маблағ йўналтиради. Компанияга, шунингдек, 2,8 минг нафар хотин-қизларни тадбиркорликка ўқитиш ва 2 минг нафар хотин-қизларнинг тадбиркорлик фаолиятига ҳамроҳлик қилиш асосида кўмаклашиш вазифаси юклатилган.
Ҳужжатга кўра, 2026 йил 1 январдан «НAMROН» тадбиркор аёлларни қўллаб-қувватлаш дастури доирасида қуйидаги қўшимча молиявий инструментлар жорий этилади:
- тижорат банклари камида 50 фоизлик улушига аёллар эгалик қиладиган ва (ёки) раҳбари аёл бўлган кичик ва ўрта тадбиркорлик субъектларининг лойиҳаларини молиялаштиришга 24 фоиз ставкагача 10,3 млрд сўмгача миқдорда кредит ажратади (бунда лойиҳа камида 10 та иш ўрни яратишни назарда тутиши лозим);
- «Бизнесни кафолатлаш миллий компанияси» банк кредитларининг 70 фоизигача бўлган қисмига кафолат (кафиллик) тақдим этади.
Фармонда назарда тутилган маблағлар Тикланиш ва тараққиёт жамғармаси томонидан «Тадбиркорликни ривожлантириш компанияси»га 14 фоизлик ставкада (МБнинг асосий ставкаси) 3 йиллик имтиёзли давр билан 7 йил муддатга ажратилади. Компания маблағларни «HAMROH» хотин-қизлар тадбиркорлигини қўллаб-қувватлаш компаниясига йўналтиради.
«HAMROH» компания кредитларни мазкур маблағларни тижорат банкларига 18 фоиз (МБ асосий ставкаси + 4 фоиз пункт) ставкагача 3 йиллик имтиёзли давр билан 7 йилдан ошмаган муддатга жойлаштиради.
7 мартдаги «Хотин-қизлар тадбиркорлигини ривожлантиришни қўллаб-қувватлашга оид қўшимча чора-тадбирлар тўғрисида»ги президент қарори билан 2025 йилда хотин-қизларни тадбиркорлик фаолиятига жалб этиш ва уларнинг лойиҳаларини молиялаштиришни кенгайтириш мақсадида уларнинг лойиҳаларини қўллаб-қувватлаш учун қўшимча 200 млн АҚШ доллари йўналтирилиши кўзда тутилган эди.
19 мартда Шавкат Мирзиёев кичик ва ўрта бизнес вакиллари билан учрашувда аёл тадбиркорларга кредит ставкаси бошқаларга нисбатан 2 фоиз арзон бўлишини маълум қилганди.