АҚШ президенти Дональд Трамп маъмурияти юқори малакали ишчилар учун H-1B визаларига ариза берувчиларни текширишни кучайтиради, деб ёзмоқда Reuters Давлат департаментининг ички йўриқномасига таяниб.
2 декабрь куни АҚШнинг барча дипломатик ваколатхоналарига юборилган телеграммада консуллик ходимлари H-1B визалари учун ариза берувчилар ва улар билан саёҳат қиладиган оила аъзоларининг резюмелари ёки LinkedIn профилларини дезинформация тарқатиш, контент модерацияси ва бошқа соҳаларда тажрибага эга эканликларини текширишлари кераклиги айтилган.
«Агар сиз ариза берувчининг Америка Қўшма Штатларида қонун билан ҳимояланган фикр билдириш шаклларини цензуралаш ёки цензура қилишга уринишда айбдор экани ёхуд бундай ҳаракатларда иштирок этгани тўғрисида далиллар топсангиз, аризачини виза олиш ҳуқуқига эга эмас деб эътироф этишга интилишингиз лозим», дейилади телеграммада.
Ушбу сиёсат Америка визаси учун барча аризачиларга тааллуқли, бироқ H-1B аризачиларини янада синчковроқ текшириш таклиф этилмоқда. Бунинг сабаби улар кўпинча технология соҳасида, жумладан, «ҳимояланган фикр билдириш шаклларини бостиришда иштирок этувчи ижтимоий тармоқлар ёки молиявий компанияларда» фаолият юритади.
«Уларнинг меҳнат фаолияти тарихини синчковлик билан ўрганиб, бундай фаолиятда иштирок этмаганлигига ишонч ҳосил қилиш керак», — дейилади телеграммада.
Янгиланган текширув талаблари янги ва такрорий ариза берувчиларга нисбатан қўлланади.
2025 йил июнь ойида АҚШ Давлат департаменти талабалар визалари учун ариза берувчиларни текширишни сезиларли даражада кучайтирган ва консуллик ходимларига «Америка фуқаролари, маданияти, ҳукумати, муассасалари ёки асосий тамойилларига душманлик билан қарайдиган» шахсларни аниқлаш учун ижтимоий тармоқлардаги аккаунтларни текширишни буюрганди.
Август ойида АҚШ ҳукумати муҳожирларнинг ижтимоий тармоқларини яшаш, иш ва бошқа турдаги визаларни олиш учун аризаларни кўриб чиқишда «Америкага қарши мафкуралар» мавжудлигини текширишни режалаштираётгани маълум бўлганди.
Сентябрь ойида Дональд Трамп «суиистеъмолларга чек қўйиш ва америкалик ишчиларни ҳимоя қилиш мақсадида» H-1B визаси учун 100 минг доллар йиғим жорий қилган.