Шавкат Мирзиёев 4 декабрь куни Сирдарё вилоятида ўтказган йиғилишида пойтахтдаги саноат корхоналарини ушбу ҳудудга кўчириш имкониятларига тўхталди, деб хабар бермоқда президент матбуот хизмати.
Тошкент шаҳридаги саноат корхоналари босқичма-босқич пойтахтдан ташқарига кўчирилмоқда, деди давлат раҳбари. Уларнинг кўпчилиги меҳнат ресурси, инфратузилмаси бор, ер-мулк солиғи арзонроқ бўлган жойларни изламоқда.
У бу борада Сирдарё эркин иқтисодий зонасида бўш турган ерларга пойтахтдаги мавжуд қувватларни жойлаштириш учун жуда катта имконият борлигини таъкидлади.
Шу боис Тошкент шаҳридаги корхонасини Сирдарёга кўчирмоқчи бўлган тадбиркорлар учун саноат зонасидаги ерлар соддалаштирилган тартибда чегирма билан таклиф этилади.
Уларга 10 млрд сўмгача имтиёзли кредит берилади. Хомашёни темирйўл орқали ташишда арзонлаштирилган тарифлар қўлланади.
Аввалроқ Тошкент шаҳар ҳокими Шавкат Умурзоқов саноат ва туризмни ривожлантириш учун ер танқислиги сабабли пойтахт энди Тошкент вилояти имкониятларидан фаолроқ фойдалана бошлашини айтганди. Айрим саноат объектлари вилоятга кўчирилади, бўшаган ерларда эса хизмат кўрсатиш соҳасида янги лойиҳалар пайдо бўлади
Ўтган йилнинг март ойида президент билан бўлиб ўтган йиғилишда саноат корхоналарини пойтахтдан босқичма-босқич унинг чегараларидан ташқарига кўчириш режалари эълон қилинганди.
