Шавкат Мирзиёев 4 декабрь куни Сирдарё вилоятига ташрифи давомида фермерлар билан учрашди. Давлат раҳбари одамларнинг умри пахта даласида 27 йил бекор ўтганини таъкидлади. Лавҳа «Ўзбекистон 24» телеканалида намойиш этилди.
«Одамларни онги ўзгарган. Умримиз пахтада бекор ўтган экан. 27 йил қийналганмиз. Шу пахта деган балони ҳаммамиз далада кўрдик, биримиз икки бўлмади. Мана кеча Жиззахга бориб фермерлар билан учрашсам, [Фермерлардан бири] 85 центнер олдим, деди», — дея қайд этди президент.
Учрашувда иштирок этган сирдарёлик фермерлардан бири бир гектардан 76 центнер пахта ҳосил олганини маълум қилди. «Мўъжиза бўлди бу. 87 деган навини экдик. Пахта бўйича бу йил жуда бир мўъжиза ҳолатга эришдик», — дейди у.
Президент аввал пахта етиштириш бўйича тажриба бўлмагани, олимларни писанд қилинмаганини таъкидлади.
«Тасаввур қилинг агар шу меҳнатимизга 50 центнер олганимизда даромадимиз қанча бўларди? Болаларни қандай ўқитардик? Илм йўқ, тажриба йўқ, билимсиз урра-урра қилиб юравердик. Ҳаммани далага чиқариб, пул бермадик, техника бермадик, олимларни писанд қилмадик. 25 центнер ҳам қилолмадик-ку вилоят бўйича. Мана қилса бўлар экан», — деди давлат раҳбари.
Сирдарёлик фермер бу йилги натижалардан ҳамма деҳқонлар ҳайратда эканини қайд этди. «Гапи очиғида энди. Тасаввуримизга сиғдиролмадик бу ердаги ҳолатни. Оддий бир меҳнаткаш трактор жуда катта қизиқишди бу йилда. Даромад пайдо бўлди», — деди фермер.
Президент пахта бўйича ишларни мукаммаллаштириш кераклигини таъкидлади.
«[Тракторчининг] 70 центнердан даромади ҳам шунга яраша-да. Энг катта нарса ишлаб чиқарган пахтамиз, қилган харажатимизни ҳам қопламасди-да. Албатта қилган ишларимиз, йўлимиз тўғри, лекин буни энди мукаммаллаштиришимиз керак», — деди Шавкат Мирзиёев.
Эслатиб ўтамиз, 2022 йилда Халқаро меҳнат ташкилоти (ХМТ) Ўзбекистонда пахта йиғим-теримида болалар ва мажбурий меҳнатдан тизимли фойдаланиш тўхтатилишини эълон қилганди. Шундан сўнг Cotton Campaign ўзбек пахтасига нисбатан кўп йиллик глобал бойкотни бекор қилган.
Ўша йили Better Cotton Initiative Ўзбекистонда ишлаб чиқарувчиларни атроф-муҳит, маҳаллий аҳоли ва иқтисодиёт учун янада қулай пахта етиштиришда қўллаб-қувватлаш дастурини расман ишга туширган.