Yandex Uzbekistan компанияси кино, сериал ва телевидениени онлайн кўрсатувчи Allplay платформасини сотиб олди. Бу ҳақда компания матбуот хизмати Gazeta`га маълум қилди.
Yandex Uzbekistan маълумотларига кўра, битим фойдаланувчиларга Allplay онлайн кинотеатридан фойдаланиш имконини берувчи Anyway ва Allmedia Safe Service`нинг 100 фоиз акцияларини ўз ичига олади.
Харид нархи ошкор этилмади. Компаниянинг таъкидлашича, келишув барча норматив ҳужжатлар, жумладан, Ўзбекистон Рақобат қўмитаси қарори билан тасдиқланган.
Yandex, шунингдек, Allplay бренди ёпилмаслигини таъкидлади: у тез орада янгиланади ва Yandex Plus обуна хизмати экотизимининг бир қисмига айланади. Платформа фильмлар ва телесериаллар, мусиқа, китоблар, спорт трансляциялари ва компаниянинг содиқлик дастуридан фойдаланиш имконини беради.
Yandex Allplay каталоги қуйидаги контент билан кенгайтирилишини қўшимча қилди:
- Wink, Start, KinoPoisk онлайн кинотеатрлари (жумладан HBO контенти),
- Amediateka видео хизмати,
- телеканаллар,
- шунингдек, бошқа ҳамкорлар.
Allplay Ўзбекистонда 2016 йили иш бошлаган. Битимга қадар Allmedia Safe Service`нинг таъсисчилари Грант Баградович Саркисов ва Рамиль Ралиевич Рафиков (ҳар бири 50 фоиз) эди. Ҳозир компанияга Дубайда (БАА) рўйхатдан ўтган Plus Entertainment Services Holding Ltd эгалик қилади. У Yandex Uzbekistan бизнесига эгалик қилувчи халқаро Yango Group компаниялар гуруҳи таркибига киради.
2025 йил август ойида Рақобат қўмитаси Allplay`ни Ўзбекистонда онлайн-трансляция платформалари ва онлайн-кинотеатрлар бозорида устун мавқега эга оператор деб топди.
2024 йил октябрда Yandex Uzbekistan Express24 етказиб бериш хизмати активларининг бир қисмини сотиб олган ва шу орқали ўша пайтда озиқ-овқат етказиб бериш агрегаторлари бозоридаги улуши 87,5 фоизга етган.
