Ўзбекистонда эндиликда пахта ва ғалла йўналишидаги фермерларнинг алоҳида рейтинги юритилади, деб хабар бермоқда президент матбуот котиби Шерзод Асадов давлат раҳбарининг қишлоқ хўжалиги ходимлари билан учрашувига таяниб.
Бунда камида 10 йилдан ортиқ ишлаётган, кредит, лизинг ва солиқдан муддати ўтган қарзи бўлмаган фермерларга рейтингига қараб Қишлоқ хўжалиги жамғармасидан берилаётган имтиёзли кредит ставкалари янада пасайтирилади.
Рейтингнинг юқори поғонасида турган фермерларга кредит ставкаси пахта учун 8 фоиз, ғалла учун 10 фоиз қилиб белгиланади.
Бундан ташқари, «Мирзачўл» кластери чўл шароитида 2025 йил пахтадан гектарига 50−55 центнердан ҳосил олгани, унга бириктирилган 27 нафар фермер эса ҳосилдорликни 85 центнергача олиб чиққани таъкидланди.
Ушбу тажрибани оммалаштириш учун Мирзачўлда инновацион қишлоқ хўжалиги мактаби ташкил қилинмоқда. Бутун республикадаги минг нафар фермер ушбу мактабда чўл шароитида пахта етиштириш бўйича ўқитилади. Мазкур мактабда ўқиб, сертификат олган фермерларга рейтингда қўшимча 10 балл берилади.
Шу билан бирга, илғор фермерларни устоз сифатида кам ҳосил олаётган фермерларга бириктириб, ҳар икки томонга ҳам манфаатли бўладиган тизим қилинади, дейилади хабарда.
Устоз фермерлар ўз тажрибасини шогирд фермерга ўргатиб, ҳосилни 50 центнердан оширишга кўмаклашса, 5 миллион сўм мукофот олади.
