Шавкат Мирзиёев 16 декабрь кунги йиғилишда сўнгги йилларда Тошкентда олиб борилган ишлар натижаларини сарҳисоб қилди. Бу ҳақда давлат раҳбари матбуот котиби Шерзод Асадов маълум қилди.
Унинг сўзларига кўра, тўққиз йил ичида Тошкент иқтисодиёти 20 млрд доллардан ортиқ тўғридан-тўғри хорижий инвестиция жалб қилган ва тахминан 5000 та йирик лойиҳа амалга оширилган. Жон бошига тўғридан-тўғри хорижий инвестициялар 2017 йилдаги 71 доллардан 2200 долларгача ошди.
Шаҳарнинг тижорий майдонлари 14 бараварга ошиб, 67 млн квадрат метрга етди, тадбиркорлар сони эса 140 мингга яқинлашди.
Қурилишнинг ривожланиши, шунингдек, янги чакана савдо, хизмат кўрсатиш ва кўнгилочар муассасаларнинг ишга туширилиши «тунги иқтисодиёт»нинг ривожланишига ҳисса қўшди. Кунига 24 соат ишлайдиган чакана савдо ва хизмат кўрсатиш шохобчалари сони 3000 дан ошди.
Пойтахт аҳолиси «шаҳар пиёдалар учун «тамойили асосида ўз маҳаллалари ва кўчаларида ижобий ўзгаришларни қайд этмоқда. Тошкентга мингта электробус ва автобус олиб келинди, 168 та янги йўналиш очилди. Шунингдек, 33 километрлик янги метро линиялари ва 21 та бекат қурилди. Яшнобод, Миробод, Сергели, Янгиҳаёт ва Юнусобод туманларининг қарийб бир млн аҳолиси учун метро янада қулайроқ бўлди.
Президент уй-жой қурилиши ҳажми ҳам сезиларли даражада ошганини маълум қилди. Илгари Тошкентда йилига 2000−2500 тадан ортиқ квартира қурилмаган бўлса, сўнгги йилларда бу кўрсаткич йилига ўртача 15,5 мингдан ортиқ квартирани ташкил этди.
Сўнгги уч йил ичида пойтахт аҳолиси ва тадбиркорларини электр энергияси билан таъминлашни яхшилаш учун тахминан 3,5 трлн сўм ажратилди. Келгуси йилда ушбу мақсадлар учун қўшимча 1,5 трлн сўм ажратиш режалаштирилган.
Умуман олганда, Тошкент иқтисодиёти сўнгги тўққиз йил ичида 2,5 баравар ўсди ва бу йил 27 млрд долларга етади. Жон бошига даромад 4400 дан 8600 долларгача ошди.
Натижада камбағаллик даражаси йил бошидаги 7,3% дан 1% гача, ишсизлик эса 4,5% дан 3,5% гача пасаяди. Шу тариқа Тошкентдаги камбағаллик ва ишсизлик даражаси табиий даражага тушади, деди давлат раҳбари.
Декабрь ойи бошида президент аҳоли бандлиги ва камбағалликни камайтиришни муҳокама қилганди. Йил охиригача унинг даражаси (йил бошидаги 8,9% дан) 6% га, келгуси йил эса 4,5% гача тушиши керак. Энг муаммоли маҳаллаларга эътибор қаратиш, электр, интернет, томорқадан фойдаланиш имкониятларини кенгайтириш вазифаси қўйилган.