Тошкент вилояти ва пойтахт йўналишида ҳаракатланувчи такси ҳайдовчиларини таҳқирлаб, улардан ноқонуний улуш талаб қилиб келган уюшган жиноий гуруҳ фаолиятига чек қўйилди, дея хабар бермоқда Ички ишлар вазирлиги матбуот хизмати.
Қайд этилишича, уларнинг фаолияти Тошкент вилоятида яшовчи фуқаронинг аризасига кўра аниқланган. Гуруҳ вилоят ҳудудидан Тошкент шаҳри Яшнобод туман йўналишида такси хизматини кўрсатувчи ҳайдовчиларга таҳдид қилиб, ноқонуний пул топиш мақсадида ўзбошимчалик билан ойлик тўлов жорий қилиб келган. Бу гуруҳга «Бычок» лақабли шахс бошчилик қилган.
ИИВга кўра, «Бычок» — 37 ёшли Ш. А. бўлиб, муқаддам уч маротаба Жиноят кодексининг безорилик моддаси билан судланган. Спортнинг турли йўналишлари билан шуғулланиб келган ушбу шахс шериклари билан биргаликда Damas ҳайдовчисини уриб, тан жароҳати етказган ва бошқарувдаги машинаси калтини зўрлик ишлатиб олиб қўйган.
Жиноий гуруҳ доимий равишда ҳайдовчиларнинг йўналишда ҳаракат қилишига тўсқинлик қилиб келган. Ариза муаллифини ҳам ҳаёти ва соғлиғига жиддий зиён етказиш билан қўрқитиб, келгусида Яшнобод туман ҳудудига қатновни амалга ошириш эвазига олдиндан икки ойлик тўлов сифатида 810 доллари олган. Кейинги тўловларни тўлиқ бера олмаганлиги сабабли йўналишга чиқишни ўзбошимчалик билан тақиқлаган, дейилади хабарда.
Ҳолат юзасидан жиноий гуруҳ етакчиси ва унинг шерикларига нисбатан Жиноят кодексининг 165-модда 2-қисми «в» банди (Уюшган гуруҳ томонидан ёки унинг манфаатларини кўзлаб товламачилик қилиш) билан жиноят иши қўзғатилган.
Вазирлик ушбу гуруҳнинг ҳаракатларидан азият кўрганлардан ички ишлар органларига ёки 102 рақамига қўнғироқ қилишларини сўради ҳамда мурожаатчининг шахси сир сақланишини билдирди.
