Янгийўлда ҳайвонларга нисбатан шафқатсиз муносабатда бўлган эркак ҳибсга олинди, деб хабар берди Тошкент вилояти Ички ишлар бош бошқармаси.
2 январь куни «Меҳр ва оқибат» ҳайвонларни ҳимоя қилиш жамияти обуначи томонидан юборилган видеони эълон қилди. Видео изоҳида эркак итини гўшт учун сўйгани айтилган.
Кўнгиллилар Ички ишлар вазирлигига ҳайвонларга нисбатан шафқатсизлик қилган шахсни аниқлаш ва уларни қонун доирасида жавобгарликка тортиш илтимоси билан мурожаат қилди.
7 январь куни Ekolog.uz жамоат ташкилоти Telegram каналида текширув якунлари бўйича хабар берилишича, Янгийўл шаҳрида яшовчи шахс шунга ўхшаш жиноятларни мунтазам равишда содир этган, жумладан, ўз итларини ҳам ўлдирган ва гўштини истеъмол қилган.
«Воқеа жойига волонтёрлар ва ҳайвонларни ҳимоя қилувчилар маҳалла нозирлари билан бирга етиб келганида, уйда унинг онаси ва синглиси ҳам бўлган. Улар содир бўлаётган воқеалардан чин дилдан ларзага тушишган. Она охиригача ўғлининг бундай ишни қилиши мумкинлигига ишонишни истамаган. Ҳатто унга видеоёзувлар кўрсатилгандан кейин ҳам инкор давом этган», — деб хабар берди экофаоллар.
Ички ишлар бош бошқармасининг маълумотларига кўра, видеога олинган итнинг ўлдирилиши 2025 йил сентябрь ойида содир бўлган. Орган ходимлари Янгийўл шаҳридаги Сабо маҳалласида яшовчи 27 ёшли фуқарони қўлга олди. Унга Маъмурий жавобгарлик тўғрисидаги кодекснинг 111-моддаси (Ҳайвонларга нисбатан шафқатсиз муносабатда бўлиш) бўйича айблов қўйилди. Тергов олиб борилмоқда.
Таъкидлаш керакки, ҳайвонларга нисбатан шафқатсиз муносабатда бўлиш уларнинг нобуд бўлишига ёки жароҳатланишига сабаб бўлса, 10 БҲМ (4,12 млн сўм) миқдорида жарима ёки 15 кунгача маъмурий қамоқ жазоси белгиланиши кўзда тутилган.
Вилоят ИИБ фаол фуқаролик позициясини намоён этаётган фуқароларга миннатдорлик билдирди.
