2025 йилда Тошкент метроси деярли 290 миллион йўловчи ташиди. Бу 2024 йилда ташилган 270,3 миллион йўловчига нисбатан 20 миллион ёки 7,4 фоиз кўп, дея Gazeta сўровига жавобан маълум қилди метрополитен ахборот хизмати.
Таъкидланишича, ўтган йили энг кўп йўловчи оқими «Чилонзор», «Буюк ипак йўли» ва «Беруний» бекатларида кузатилган. Йўловчиларнинг 6 миллиондан ортиғини турли имтиёзга эга, 10 миллиондан зиёдини эса пенсионлар ташкил этган. Метрополитеннинг эслатишича, улар учун метродан фойдаланиш бепул ҳисобланади.
«Метрополитен илк бор 2024 йил 16 декабрь куни 1 миллион нафар йўловчига хизмат кўрсатган бўлса, бу кўрсаткич 2025 йилда кўп марта қайд этилди. Ҳафтанинг иш кунлари ва таълим муассасаларида дарс жараёни бўлган мавсумда кунлик йўловчилар оқими 1 миллиондан ошди. Таътил вақти ҳамда дам олиш кунлари йўловчилар оқими сезиларли даражара камайиши табиий жараён», — дейилади ахборотда.
Қайд этилишича, 290 миллион йўловчининг деярли 90 фоизи йўл ҳақини электрон тўлов асосида, қолгани эса нақд пул (QR код) орқали амалга оширган.
«Йўловчилар нақд пулига ҳам кассадаги QR кодли чиптани, ҳам Alif инфокиоскалари орқали QR чипта харид қилишлари мумкин. Электрон тўловларда эса мамлакат ҳудудида амал қиладиган барча банк карталаридан фойдаланиши ҳамда PalmPay ва FecePay орқали йўл ҳақини тўлаши мумкин», — дейилади метрополитен ахборотида.
Таққослаш учун, 2023 йил метродаги йўловчилар сони 172 миллион, 2022 йилда 136,7 миллион, 2021 йилда 101,8 миллион, пандемия йили бўлган 2020 йилда эса 38,8 миллион кишини ташкил этган.
