Арманистон Ташқи ишлар вазирлиги Россия элчисини вазирликка чақириб, унга расмий нота топширди. Бу қарор Россия давлат телеканалида эфирга чиққан Кремль ташвиқотчиси Владимир Соловьёвнинг баёнотлари билан боғлиқ.
Арманистон ТИВ матбуот котиби Ани Бадаляннинг маълум қилишича, нота орқали Соловьёв томонидан айтилган сўзлар Арманистон Республикасининг суверенитетига тажовуз сифатида баҳоланган. Вазирлик бу баёнотларни дўстона муносабатлар тамойилларини қўпол равишда бузувчи ва душманона характерга эга, деб атаган.
Гап Россияда эфирга узатилган «Соловьёв. Life» дастурида 10 январь куни айтилган фикрлар ҳақида бормоқда. Унда рус пропагандачиси Россия учун Арманистон ва Марказий Осиёдаги мавқени йўқотиш «жуда катта муаммо» эканини айтган. Шунингдек, у миллий хавфсизликни таъминлаш учун Россия бошқа ҳудудларда ҳам ҳарбий амалиётлар ўтказиши мумкинлиги ҳақида мулоҳаза билдирган.
Арманистон ТИВ бу каби баёнотлар қабул қилиб бўлмаслигини таъкидлаб, Россия томонидан давлатлараро муносабатларда ўзаро ҳурмат ва суверенитет тамойилларига риоя қилиниши зарурлигини билдирган.
Эслатиб ўтамиз, Соловьёвнинг ушбу баёнотига нисбатан ўзбек фаоллари ҳам кескин чиқишлар қилди. Жумладан, депутат Алишер Қодиров «Владимир Соловьёвнинг бепушт чиқиши унинг чорасизлик ва мажруҳлик даражасидан далолат» эканини ёзади.
«Юксалиш» УМҲ раиси Бобур Бекмуродов эса гапини «Соловёвнинг фикрларига тупуриш»дан бошлаб, «халқлар тақдири телестудиялардаги бақир-чақирлар ёки «катта оғалар»нинг кўрсатмаси билан ҳал қилинадиган даврлар тарих ахлатхонасига кетгани»га анча бўлганини тушунтиради.