15 январь куни бўлиб ўтган йиғилишда Ўзбекистоннинг АҚШдаги элчиси Фурқат Сидиқов Халқаро ўзбеклар кунини белгилашни ҳақидаги хориждаги ватандошлар илтимосини президентга етказди, Шавкат Мирзиёев таклифни маъқуллади. Бу акс этган йиғилишдан парчалар «Ўзбекистон 24» телеканали орқали намойиш этилди.
Йиғилишда президент АҚШда маҳалла гузари ва чойхоналар ташкил этиш кераклигини таъкидлади.
«Нью Йоркда ёки Вашингтонда маҳалла гузари қураман деб ваъда берганман. Шу бўйича тадбиркорларнинг таклифларини бериб, ўзимиздан ҳам шерик қилиб, бир яхши лойиҳа қилинглар, ватандошларимизга бир макон қуриб берайлик. Ватандошларимизга ғурур-ифтихор бўлиши керак, байроғимиз турган, ошхоналар бўлиши керак, чойхоналар бўлиши керак. Бу ярашади, шу йил қилайлик шуни», — деди Шавкат Мирзиёев.
Фурқат Сидиқов президентнинг АҚШдаги учрашувидан сўнг ватандошлар берган ваъдасидан чиқиб, Ўзбекистонда 2000 та иш жойини яратганини қайд этди. Шунингдек, у Халқаро ўзбеклар кунини белгилаш ҳақидаги хориждаги ватандошлар илтимосини президентга етказди.
«Ватандошларнинг бир илтимоси бор эди: Халқаро ўзбеклар кунини белгилаш ва бутун дунёда шу кунни элчихоналар ёрдамида нишонлаш. Сиздан шуни илтимос қилишяпти», — деди Сидиқов .
«Бу тўғри таклиф, буни ичимда армонларимиз бизда шу кунларга келдик, буни ҳам энди қилишимиз керак», — дея бу таклифни маъқуллади давлат раҳбари.
Шунингдек, Фурқат Сидиқов президентга берган ҳисоботида у Ўзбекистон элчиси сифатида АҚШ раҳбарияти билан мулоқот осонлашганини маълум қилди.
«2025 йил Ўзбекистон ва АҚШ муносабатларида ҳақиқатда тарихий бурилиш бўлди. Сизга катта раҳмат. Сизнинг президент Трамп жаноблари билан мулоқотларингиз бизнинг Ўзбек-Америка муносабатларини тарихда биринчи марта институтсионаллаштирди. Мана шуни очиқ айтишим керакки, бугунги кунга келиб, мен Америка раҳбарияти, Оқ уй вакиллари ва конгрессменлар эшигини тақиллатмасдан очдим. Ҳамма эшикларни очиб бердингиз», — деди элчи.
Унинг қайд этишича, охирги икки йилда Америкада ватандошлар ёрдамида тўртта савдо уйи очилган. Бу йили «БМБ» компанияси билан ҳамкорликда Американинг «Костка» савдо тизимида Ўзбекистон заъфаронини сотиш кўзда тутилган.
Шунингдек, Сидиқов Америка компаниялари Ўзбекистоннинг IT паркига ва IT компанияларига ҳамкорлик қилишга қизиқаётганини билдирди.