Фарғона вилоятининг Бешариқ туманида кўчма контейнерларга газ тўлдиришни таъминлаш учун компрессор станцияси қурилиши ишлари ҳамон давом этмоқда. Бу ҳақда Энергетика вазирлиги ахборот хизмати Gazeta сўровига жавобан маълум қилди.
Гап шундаки, 2025 йил қиш мавсумида Фарғона водийсида метан заправкаларнинг эҳтимолий чекловлар пайтида барқарор ишлашини таъминлаши керак бўлган мобил газ контейнерлари синовдан ўтказилиши хабар қилинганди. Энергетика вазири Жўрабек Мирзамаҳмудов 11 декабрь куни Олий Мажлис Қонунчилик палатасининг мажлисида 22 декабрга қадар Бешариқ туманидаги газ қуйиш шоҳобчаси тўлиқ ишга тушишини айтганди. Аммо 2026 йилнинг январь ойи ҳам якунланяптики, кўчма контейнерлар ҳамон фаолият бошлагани йўқ.
«Мазкур объектда тегишли комиссия томонидан ўрганиш ўтказилди. Қурилиш даврида қўшимча техник ва хавфсизлик талабларини таъминлаш зарурати бўлгани сабабли ушбу жараён маълум вақт талаб этмоқда. Ушбу техник қоидалар тўлиқ бажарилгандан сўнг объектни комиссия томонидан белгиланган тартибда қабул қилиш режалаштирилган. Шунингдек, кўчма метан газ контейнерларидан фойдаланиш бўйича тегишли қарор лойиҳаси ишлаб чиқилган ва ҳозирда тегишли ташкилотлар билан келишиш жараёнида. Мазкур ҳужжат контейнерлар фаолиятини ҳуқуқий жиҳатдан тартибга солишга хизмат қилади», — дейди вазирлик.
Таъкидланишича, кейинчалик контейнерлар фаолиятига оид қўшимча маълумотлар жамоатчиликка эълон қилинади.
Аввалроқ қиш мавсумида Фарғона водийсида автомобилларга мобил газ қуйиш тизими синовдан ўтказилиши, илк босқичда 50 та «заправка» қамраб олиниши, лойиҳа доирасида Хитойдан 150 та кўчма контейнер сотиб олиш режалаштирилгани ҳақида маълум қилинганди.
