17 январь куни дипломатик вакилларнинг тадбиркорлар билан учрашувида Ўзбекистоннинг Малайзиядаги элчиси Каромидин Гадоев хорижий сайёҳлар орасида Ўзбекистонга қизиқиш ортиб бораётгани ҳақида гапирди.
Унинг таъкидлашича, мамлакат имиджини тарғиб қилиш учун турли мамлакатлар вакиллари иштирокида тез-тез инфотурлар ўтказиш зарур. Унинг сўзларига кўра, Малайзияда Ўзбекистонга саёҳатларга катта қизиқиш билдирадиган ва авиачипталарни сотиб олишга ва харажатларнинг бир қисмини ўзлари қоплашга тайёр бўлган кўплаб сайёҳлик уюшмалари мавжуд.
«Бу гуруҳлар кўпинча икки ёки учта етакчи телекомпаниялар вакилларини, шунингдек, беш ёки олтита медиаресурсни ўз ичига олади. Рамазон ойида улар Ўзбекистоннинг турли минтақалари ҳақида 10−20 та серияли фильмлар суратга олади. Агар бизнес ҳамжамияти бирон бир ёрдам кўрсатса — ҳеч бўлмаганда мамлакат ички харажатларини қопласа — сезиларли эффект берган бўлар эди», — деди Каромидин Гадоев.
Элчи Малайзияда кўплаб сайёҳлик кўргазмалари, жумладан, Бутунжаҳон ислом туризми конференцияси ҳамда йилига икки марта ўтказиладиган ва 120 дан ортиқ мамлакатларни жалб қиладиган MATTA Fair ярмаркаси ўтказилишини таъкидлади. Бироқ Ўзбекистон туристик компаниялари етарлича вакилларга эга эмас. Элчи туристик компанияларга имтиёзли шартлар асосида кўргазма майдонларини таъминлашда ёрдам беришни таклиф қилди.
Каромидин Гадоев яна бир вазифа ҳақида ҳам гапирди — тўғридан-тўғри рейслар сонини кўпайтириш. Унинг тушунтиришича, икки йил олдин Ўзбекистон ва Малайзия ўртасида ҳафтасига учта рейс амалга оширилган, ҳозир бу рақам саккизтага етган.
«Ҳозирда Самарқанд ва Бухорога рейсларни очиш лойиҳаси ишлаб чиқилмоқда. Бироқ Малайзия авиакомпаниялари билан музокаралар давомида улар очиқча айтяпти: „Сиз фақат Малайзиядан сайёҳларни олиб чиқиш устида ишлаяпсиз, қайтиш оқими эса йўқ“. Агар самолёт бир томонга ярим бўш ҳолатда учса, рейслар тўхтатилиши мумкин», — деди элчи.
У маҳаллий туристик компанияларга Малайзия йўналиши бўйича ишларини фаоллаштириш ва Ўзбекистонга сайёҳлик жозибадорлигини ошириш таклифи билан мурожаат қилди.
Элчи, шунингдек, зиёрат туризмини ривожлантириш масаласини ҳам кўтарди.
«Малайзиядаги кўплаб авиакомпаниялар Тошкент — Куала Лумпур — Тошкент — Жидда ёки Куала Лумпур — Самарқанд — Жидда йўналишларида бешинчи ҳаво эркинлиги деб аталувчи ҳуқуқни талаб қилмоқда. Бу имконият ҳали берилмаган», — деб таъкидлади у.
Унинг сўзларига кўра, янги рейсларнинг очилиши йўловчилар, почта ва юкларни учинчи мамлакат орқали ташиш имконини берувчи бешинчи ҳаво эркинлиги таъминлангандагина мумкин.
Бу ҳолатда ҳам Малайзиядан, ҳам Индонезиядан зиёратчиларни Ўзбекистон орқали юбориш, уларни мамлакатга олиб келиш ва Саудия Арабистонидаги зиёрат тугагач, яна орқага қайтариш имконияти пайдо бўлади.
«[Бундан ташқари,] кўплаб Малайзия туроператорлари Ўзбекистонда ҳали ҳам ҳалол туризм стандартларига тўлиқ жавоб берадиган ресторан ва меҳмонхоналар етишмаслигини таъкидламоқда. Бу малайзиялик сайёҳлар учун принципиал. Малайзияда ҳар бир рестораннинг менюсида барча маҳсулотлар ҳалол экани ва меҳмонлар уларни хавфсиз истеъмол қилиши мумкинлиги кўрсатилади», — деб таъкидлади элчи ва бу масалага эътибор қаратишни ҳамда туристик йўналишлардаги ошхоналарни турфа хиллаштиришни таклиф қилди.
Эслатиб ўтамиз, 9 январь куни зиёрат туризмини ривожлантириш учун субсидиялар жорий этилди, кейинги икки йил ичида «Умра плюс» зиёрат дастури орқали Индонезия ва Малайзиядан 100 минг сайёҳни жалб қилиш режалари белгилаб олинди.
Аввалроқ 15 январ куни бо’либ ўтган йиғилишда президент Шавкат Мирзиёев элчиларга «кабинет дипломатияси»дан воз кечишни сўради ва элчи «инвестиция ва технологиялар олиб келадиган, янги экспорт бозорларини очадиган, транспорт-логистика йўлакларини ишга соладиган, туристлар оқимини кўпайтирадиган, қонуний меҳнат миграцияси учун шароит яратадиган, энг асосийси, фуқароларимиз ҳуқуқларини ҳимоя қиладиган давлат вакили» эканини таъкидлади.