АҚШ президенти Дональд Трамп Франция етакчиси Эммануэль Макронни ўзининг сўнгги тинчлик ташаббусини қўллаб-қувватлаш таклифини рад этгани учун танқид қилди ва бунга жавобан шампан виносига нисбатан божлар жорий қилиши мумкинлигини билдирди. Бу ҳақда Bloomberg ёзмоқда.
«У ҳеч кимга керак эмас, чунки у тез орада лавозимини тарк этади», — деди Трамп журналистларга Макроннинг унинг таклифини рад этиши ҳақида хабар топганидан сўнг. «Мен унинг винолари ва шампанларига 200 фоизли бож соламан ва у ҳам [Тинчлик кенгашига] қўшилади», — дея қўшимча қилди у.
Бир кун аввал Le Monde нашри ўз манбаларига таяниб, Франция Трампнинг Тинчлик кенгашига қўшилиш таклифига «ижобий жавоб бериш ниятида эмас»лигини маълум қилганди. «Аслида ушбу кенгаш урушдан жабр кўрган Ғазони қайта тиклашни назорат қилиш учун ўйлаб топилган эди, бироқ унинг низоми кенгаш ролини фақат босиб олинган Фаластин ҳудудлари билан чеклаб қўймайдиган кўринади», — дейилган хабарда.
Шунингдек, Франциянинг асосий эътирози Трампнинг ушбу янги тузилмаси БМТнинг ролини заифлаштириши ёки унинг ўрнини эгаллаши мумкинлиги билан боғлиқ, дейди Le Monde. Франция БМТ Хавфсизлик кенгашидаги вето ҳуқуқига эга бўлган бешта давлатдан бири сифатида ўз мавқеини ҳимоя қилмоқда.
Президент Трамп, шунингдек, франциялик ҳамкасбидан келган матнли хабарни эълон қилди. Унда Макрон Трампни пайшанба куни Парижда кечки овқатга ҳамда Украина, Сурия, Дания ва Россия вакиллари билан учрашишга таклиф қилган.
Манба: Truth Social / Трамп
«Гренландия бўйича нима қилаётганингизни тушунмаяпман», — деб ёзган Макрон Трампга йўллаган хабарида (ушбу хабар ҳақиқийлигини Франция расмий вакили тасдиқлаган).
Шу ҳафта Давосдаги Бутунжаҳон иқтисодий форумига йўл олар экан, Трамп Европа етакчилари билан бир қатор низоларни келтириб чиқармоқда. У Даниядан Гренландияни АҚШга топширишни талаб қилганига қарши чиққан саккизта давлатни божлар билан қўрқитди, Нобель тинчлик мукофотини унга беришмагани учун Норвегия ҳукуматига «тош отди» (аслида эса бу мукофот Норвегия ҳукумати томонидан берилмайди) ва энди у Францияни ўзининг Тинчлик кенгаши деб аталмиш тузилмасига қўшилишга мажбур қилмоқда.
Дастлаб Ғазони қайта тиклашни назорат қилиш учун ўйлаб топилган бу Тинчлик кенгашининг ваколатлари, бир неча европалик мулозимларнинг фикрича, тобора кенгайиб бормоқда ва Трамп ундан бошқа можароларни ҳал қилиш ҳамда халқаро воқеаларга таъсир ўтказиш воситаси сифатида фойдаланмоқчи кўринади, деб таъкидлайди Bloomberg.
Нашр кўздан кечирган низом лойиҳасига кўра, ушбу гуруҳнинг илк раиси Трампнинг ўзи бўлади ва аъзолик бўйича қарорлар қабул қилиш ваколатини қўлга киритади. Трамп маъмурияти ушбу органда доимий ўринга эга бўлишни истаган давлатлардан камида 1 миллиард доллар бадал тўлашни талаб қилмоқда.
Аввалроқ Bloomberg Трампнинг Ғазо бўйича Тинчлик кенгашига аъзолик таклифини олган давлатлар рўйхатини эълон қилганди. Унда 49 та давлат (жумладан, Ўзбекистон) ва Европа комиссияси кўрсатиб ўтилган. Бу рўйхатдан жой олмаган Хитой ҳам таклифни қабул қилганини тасдиқлади, аммо қандай тўхтамга келгани аниқ эмас.
Ўз навбатида, Ўзбекистон президенти Шавкат Мирзиёев ҳам АҚШ раҳбари Дональд Трампдан «узоқ муддатли тинчлик, барқарорлик ва хавфсизликни шакллантириш учун масъулиятни ўз зиммасига олишга тайёр бўлган давлатларни бирлаштиришга қаратилган янги халқаро тузилма» — Тинчлик кенгашини тузишда таъсисчи давлат сифатида иштирок этиш таклифини олгани ва бунга розилик берган.