Москвадаги 2-Ғарбий округ ҳарбий суди Ўзбекистон фуқароси Аҳмаджон Қурбоновни Россия Қуролли кучларининг радиация, кимёвий ва биологик ҳимоя кучлари бошлиғи Игорь Кирилловнинг ўлимига сабаб бўлган террорчилик ҳужумини содир этганликда айбдор деб топиб, умрбод қамоқ жазосига ҳукм қилди. Шунингдек, у 1 миллион рубль миқдорида жаримага тортилди, деб хабар берди РБК 21 январь куни.
Қурбонов жазосининг дастлабки 10 йилини қамоқда, қолган қисмини эса махсус тартибли колонияда ўтказиши керак.
Суд ишнинг яна учта фигурантига ҳукм чиқарди. Батухан Точиев 22 йилга, Рамазан Падиев ва Роберт Сафарян эса мос равишда 18 ва 25 йилга озодликдан маҳрум қилинди.
Қурбонов жиноятда ўз айбини тўлиқ, Сафарян эса қисман тан олди. Падиев ва Точиев эса айбларини тан олмади.
Игорь Кириллов ва унинг ёрдамчиси Илья Поликарпов 2024 йил 17 декабрь куни эрталаб Москвадаги Рязанский проспектида генералнинг уйи ёнида тўхтаб турган электр самокатга ўрнатилган қўлбола бомба портлаши оқибатида ҳалок бўлганди. Қурбонов портлашдан бир неча соат ўтгач ҳибсга олинган.
Россия Тергов қўмитасининг таъкидлашича, сўроқ пайтида Курбонов «Украина разведка хизматлари томонидан ёлланганини» ва жиноятни содир этгани учун 100 минг доллар ва Европа мамлакатларидан бирига юбориш ваъда қилинганини айтган. Ҳуқуқни муҳофаза қилиш органларининг маълумотларига кўра, Точиев ва Падиев Курбонов учун ҳостелда хона ижарага олган, Сафарян унга Польшадан жўнатилган портловчи мослама учун компонентлар берган.
