Ўзбекистонда ОАВ ва интернетда хориждаги жанговар ҳаракатларда иштирок этишни тарғиб қилувчи материалларни тарқатганлик учун жавобгарлик жорий этиш режалаштирилмоқда. Депутатлар Маъмурий жавобгарлик тўғрисидаги кодексга ўзгартиришларни қабул қилди.
Маъмурий жавобгарлик тўғрисидаги кодексга ўзгартиш ва қўшимчалар киритилди Олий Мажлис Қонунчилик палатаси 3 февраль куни Маъмурий жавобгарлик тўғрисидаги кодексга киритилган ўзгартиш ва қўшимчаларни биринчи ўқишда қабул қилди.
Унга кўра, хорижий давлат ҳудудида ёки унинг тарафида қуролли можаролар ёки ҳарбий ҳаракатларда иштирок этишни тарғиб қилувчи маҳсулотни тарқатганлик ва намойиш этганлик учун маъмурий жавобгарлик белгиланади.
«Жойларда ўтказилган ўрганишларда аниқланишча, бугунги кунда кўп қаватли уйларда, тунги ёритқич устунлари, бошқа оммавий жойларда хорижда ишлаш ёки катта пул топиш бўйича граффит ва варақалар орқали хориждаги жанговар ҳаракатларга жалб қилувчи Telegram каналлар аниқланган. Аксарият ҳолатларда хорижда ишлаш ҳамда катта пул топиш бўйича граффит ва варақаларда жанговар ва наркокурерлик ҳаракатларига жалб қилувчи Telegram манзиллари мавжудлиги аниқланди», — дейилади мажлисда.
Шунингдек, қонун лойиҳаси билан содир этган ҳуқуқбузарликни тарғиб қилувчи маҳсулотларни интернетда намойиш этганлик ва интернетда ҳақорат учун маъмурий жавобгарлик белгилаш кўзда тутилган.
