Самарқандда вояга етмаган қизни ўғирлаб кетган тўрт киши жиноий жавобгарликка тортилди, деб хабар берди Kun.uz суд ҳукми билан танишиб чиққач.
Иш материалларига кўра, 1995 йилда туғилган Б.Х. 2025 йил 6 август куни эрталаб танишлари — 29 ёшли М.М., 28 ёшли А.М. ва 24 ёшли У.З. — билан олдиндан тил бириктириб, вояга етмаган қизни ўғирлаб кетган.
Ўша куни эрталаб улар А.М. бошқарувидаги Nexia машинасида Каттақўрғон тумани бўйлаб кетаётганида йўлни кесиб ўтаётган бир қизни кўрган. У нон сотиб олиш учун кўчанинг нариги томонидаги дўконга кетаётган бўлган.
Б.Х. ва У.З. қизга яқинлашиб, уни урган, сочларидан тортиб, машинага мажбуран ўтқазган ва қочиб кетган. Бироз вақт ўтгач, улар қизни ўша жойга қайтариб олиб келган.
Б.Х. ва унинг шериклари суд мажлисида ўз айбларини тўлиқ тан олди, аммо «хато қилишганини» айтди.
Унинг сўзларига кўра, аввалги тунда у дўстларини «ўтириш» учун тўплаган. Пиво сотиб олгандан сўнг, улар Нарпай канали бўйига йўл олган ва у ерда тонг отгунча ичган.
«Тонг ота бошлагани сабабли У. З. уйига қайтиши кераклигини айтди. А. М. уни уйигача олиб боришини, сўнг машинани газ билан тўлдириб олишини айтди. Биз барчамиз машинага ўтирдик. Навбаҳор маҳалласидаги „Азизбек“ чойхонаси ёнидан ўтаётганимизда, йўлнинг ўнг томонида бизга нотаниш бир қизни кўриб қолдик. Шу пайт У. З.: „Машинани тўхтатинг, бу менинг танишим, тунги клубларда юрадиган қиз“, — деб айтди», — дея кўрсатма берди Б. Х. судда.
«Биз барчамиз маст бўлганимиз учун У. З. айтган қиз билан жинсий алоқа қилишни истадик. А. М. машинани қиз ёнида тўхтатди. Мен машинадан тушдим. Шу пайтда қиз йўлнинг иккинчи томонига ўтаётган эди. Мен унинг орқасидан бориб, қўлидан ушладим ва машинa томон торта бошладим. У қаршилик кўрсатиб: „Мен сиз ўйлаган қизлардан эмасман, мени қўйиб юборинг“, — деб айтди. Машинадан У. З. ҳам тушди. Шундан сўнг биз қизни иккинчи қўлидан ҳам ушлаб, куч ишлатиб машинaга ўтқаздик», — деди Б. Х. судда.
Машинага мажбуран ўтқазилган ўсмир қиз йиғлаб, қўйиб юборишларини илтимос қилган, онаси уни нонга юборганини айтиб, қўлидаги 8000 сўмни кўрсатган.
Ўшанда А.М. қизга улар ИИБ ходимлари эканини айтган. «Бир қиз онасини ўлдириб қочиб кетди. Шунинг учун биз сени тўхтатиб, машинага ўтқаздик», — деган у қизга.
Б.Х. У.З.дан бу ўша қиз экани ёки хато қилгани ҳақида деб сўраган. У.З. хато қилганини тасдиқлаган. Шундан сўнг эркаклар уни олиб кетишган жойига олиб борган ва ўша ерда қолдирган.
Бошқа судланувчилар ҳам шунга ўхшаш кўрсатмалар берди.
Каттақўрғон тумани Жиноят ишлари бўйича судининг 2025 йил 16 декабрдаги ҳукми билан улар Жиноят кодексининг 137-моддаси (Одам ўғирлаш) 2-қисмининг «а» ва «в» бандларида назарда тутилган жиноятни содир этганликда айбдор деб топилди.
Б.Х. 5,5 йилга, М.М., А.М. ва У.З. эса 5 йилдан озодликдан маҳрум қилинди. Юқори суд инстанцияси дастлабки ҳукмни ўз кучида қолдирди.
Стратегик ислоҳотлар агентлигининг Delivery Unit офиси бошлиғи Азиза Умарова суд ҳукми ҳақида фикр билдирди.
«Уларнинг „изоҳи“ — гўёки уни клубдан чиққан қиз деб ўйлашгани — ҳеч қандай танқидга чидамайди. Бу хатолик эмас. Бу — ҳуқуқий жиҳатдан мутлақо аҳамиятсиз баҳона», — деди у.
Азиза Умарова вояга етмаганларга нисбатан жамоавий зўравонлик бутун дунё бўйлаб энг оғир жиноятлардан бири эканини таъкидлади.
«Ҳар бирига бор-йўғи беш йил. Бу жазо эмас. Бу — зўравонликни амалда легаллаштириш, — деб ёзди у. — Бундай қарорлар жамиятга очиқ сигнал юборади: боланинг ҳаёти, танаси ва хавфсизлиги — иккинчи даражали. Агар болани гуруҳ бўлиб олиб кетиш ва унга нисбатан зўравонлик учун енгил жазо қўлланилса, эртага бу яна такрорланади».