Хитой яширин эшик тутқичли автомобиллар ишлаб чиқаришни тақиқлади ва биринчи марта Tesla автомобилларида жорий этилган бундай дизайнлардан фойдаланишни тақиқлаган биринчи мамлакат бўлди, деб хабар бермоқда CNN.
Янги қоидалар Хитой Саноат ва ахборот технологиялари вазирлиги томонидан 3 февраль куни эълон қилинди ва 2027 йил 1 январдан кучга киради. Агентлик ўз баёнотида «яширин эшик тутқичларидан фойдаланиш ноқулайлиги ва бахтсиз ҳодисадан кейин уларни очишнинг иложи йўқлиги»ни таъкидлади.
Қоидаларга кўра, ҳар бир йўловчи эшигининг ташқи томонида қўл тутқични ушлаши учун камида 6×2 см ўлчамдаги чуқурча бўлиши керак. Шунингдек, машина ичига эшикни ичкаридан қўлда қандай очишни кўрсатувчи белгилар ўрнатилиши керак, аниқлик киритди BBC News.
Ҳукумат томонидан тасдиқланган ва Хитой бозорига киришга тайёргарлик кўраётган автомобиллар 2029 йилгача эшикларини очиш механизмини янгилаши керак бўлади.
Яширин эшик тутқичлари Хитойнинг электромобиллар (NEV) бозорида, жумладан, электромобиллар, гибрид автомобиллар ва бензинли автомобиллар бозорида кенг қўлланади. China Daily нашри келтирган маълумотларга кўра, улар энг кўп сотиладиган 100 та электромобилнинг тахминан 60 фоизига ўрнатилган.
Янги стандартлар фақат Хитойда сотиладиган автомобилларга тааллуқли бўлса-да, улар бутун дунё бўйлаб автоишлаб чиқарувчиларни эшик дизайнини қайта кўриб чиқишга ундаши мумкин, чунки Хитой электромобиллар технологиясида глобал етакчи ҳисобланади.
Чора-тадбирларнинг кучайтирилиши Хитойда содир бўлган бир қатор ҳалокатли бахтсиз ҳодисалар, жумладан, иккита Xiaomi автомобилининг ёниб кетиши ортидан амалга оширилди. Bloomberg’нинг ёзишича, электр тизими ишдан чиққани сабабли эшиклар очилмаган ва оқибатда автомобиллардаги йўловчилар ҳалок бўлган, деб тахмин қилинмоқда.
BYD ижрочи вице-президенти Стелла Ли Bloomberg TV телеканалига интервьюсида компания ҳукумат талабларига жавоб бериш учун дизайн ўзгаришларини киритишга тайёрлигини айтди.
Американинг Tesla компанияси ҳам Хитойга етказиб бериладиган автомобиллар учун зарур ўзгаришларни амалга оширишини тасдиқлади.
Wall Street Journal’нинг таъкидлашича, яширин эшик тутқичлари сўнгги йилларда, айниқса, электромобилларда тобора оммалашиб бормоқда. Эшик юзасидан чиқиб турадиган ва қўл ҳаракати билан ҳар доим очиш мумкин бўлган анъанавий механик тутқичлардан фарқли равишда, яширин тутқичларни дастлабки ҳолатида ушлаб бўлмайди. Улар фойдаланиш зарурати туғилганда — калит ёки телефон орқали берилган буйруқ билан ёки тутқични босиш орқали қўлбола тарзда чиқиб келади.