Гулнора Турсунхўжаева 20 йилдирки Тошкентнинг Чорсу бозоридаги эски буюмлар бўлимида китоб сотади. Аввалига ишни уйидаги кераксиз кийим-кечаклар ва жиҳозларни сотишдан бошлаган онахон кейинчалик китоб савдосига ўтиб кетган. «Оиламизда ҳамма китоб ўқирди, катталар ўқиётган асарнинг тугашини кутиб турардим», — дейди у.
Гулнора ая ҳозир ўзидаги китоблар сони-ю, нечта асар мутолаа қилганини аниқ айтолмайди — улар анча-мунча. Онахонда ўзбек ва русчадан тортиб, немис ва инглизча тиллардаги китоблар ҳам бор. Излаганингиз чиқмаса, аяга хабарини бериб қўясиз, кейинги сафар келгунингизгача топиб қўяди.
Gazeta мухбири 76 ёшли Гулнора Турсунхўжаева билан суҳбат қурди. У нега айнан шу ерда китоб сотиши, совуқ кунларда ҳам бозорга келавериши ва энг қадрли китоби ҳақида сўзлаб берди.
