Флорида штати Жанубий округи федерал суди Дональд Трампга (ўша пайтдаги АҚШ президентлигига номзод) суиқасд қилишга уриниш иши бўйича айбдор деб топилган Райан Рутни умрбод қамоқ жазосига ҳукм қилди, деб хабар бермоқда CNN ва BBC News.
2025 йил сентябрь ойида ҳакамлар ҳайъати 59 ёшли Рутни бешта банд бўйича, жумладан, ўқотар қуролга эгалик қилиш билан боғлиқ ҳуқуқбузарликлар ва федерал офицерга ҳужум қилишда айбдор деб топганди.
Ҳукм чиқариш тўғрисидаги меморандумда судья Айлин Кэннон Рутнинг жиноятлари «шубҳасиз, умрбод қамоқ жазосига лойиқ» эканини таъкидлади.
«[У] амалдаги президентликка номзодни ўлдириш мақсадида бир неча ой давомида чоралар кўрган, ўз йўлида тўсқинлик қилган ҳар қандай одамни ўлдиришга тайёр эканини кўрсатган ва ўшандан бери ўз қурбонлари қаршисида на афсус ва на пушаймонлик билдирган», — деб ёзди судья.
Рутнинг ўзи Трампни ўлдириш ниятида бўлганини рад этган ва қамоқхонада шахсият бузилиши билан боғлиқ психологик даволанишдан ўтишга тайёрлигини маълум қилган. Маҳкум, шунингдек, судда тегишли ҳуқуқий ҳимояни таъминлай олмагани сабабли ҳакамлар ҳайъати иш фактлари бўйича чалғитилган деб ҳисоблашини айтган. Рут суддан 27 йиллик қамоқ жазосини сўраган, бироқ айблов томони умрбод қамоқ жазосини талаб қилган, деб ёзади Reuters.
- 2024 йил 15 сентябрь куни Махфий хизмат (АҚШ президентлари ва собиқ президентларини қўриқлайдиган хизмат) агентлари Трамп гольф ўйнаётган майдон яқинидаги буталар орасида қуролланган кишини пайқаб қолган ва унга қарата ўт очган. Сиёсатчи отишма содир бўлган жойдан бир неча юз метр узоқликда бўлган. Шундан сўнг эркак машинада қочиб кетган, кейинроқ гумонланувчи қўлга олинган ва у Райан Рут бўлиб чиққан.
- Бу Дональд Трампнинг сайловолди кампанияси давомида унга қилинган иккинчи суиқасд уриниши эди. 2024 йил 13 июль куни Пенсильваниядаги митинг пайтида қўшни бино томида яширинган 20 ёшли Томас Мэттью Крукс Трампга қарата ўқ узганди. Ўқ сиёсатчининг қулоғига теккан. Ҳужумчи Махфий хизмат агентлари томонидан отиб ўлдирилган.
