Сурхондарё вилояти Экология, атроф-муҳитни муҳофаза қилиш ва иқлим ўзгариши бошқармасининг туманлардан биридаги бўлими бошлиғи пора билан ушланди, дея хабар бермоқда Давлат хавфсизлик хизмати.
Қайд этилишича, у маҳаллий корхона ҳудудида рухсатнома олмасдан, ўзбошимчалик билан кесилган 14 туп гужум, 6 туп арча, 1 туп тут ва 1 туп чинор дарахти далолатномаси бўйича табиатга етказилган зарарни камайтириб бермоқчи бўлган. Бунинг эвазига 500 доллар талаб қилган.
Ўтказилган тезкор тадбирда мансабдор шахс сўралган пул маблағини тамагирлик йўли билан олган вақтида ашёвий далиллар билан ушланган.
Ҳозирда унга нисбатан Жиноят Кодексининг 210-моддаси 2-қисми «в» банди (Тамагирлик йўли билан пора олиш) билан жиноят иши қўзғатилиб, қамоқ эҳтиёт чораси қўлланган. Тергов ҳаракатлари олиб борилмоқда.
