Самарқанд шаҳридаги хусусий клиникаларнинг бирида фаолият юритувчи нейрофизиолог Шавкат Тоштемиров Gazeta`га мурожаат қилди. Унинг сўзларига кўра, у 7 февраль куни фарзандини тиббий текширувга олиб келган эркак томонидан калтакланган. Буни шифокор таҳририятга тақдим этган видеода ҳам кўриш мумкин.
Шавкат Тоштемиров Gazeta мухбири билан суҳбатда ҳолат ҳақида ички ишлар органлари ходимлари хабардор экани, аммо зўравонга ҳалигача чора кўрилмаётганидан шикоят қилди.
Шифокорни калтаклаган фуқаро. Видеодан скриншот.
«Декабрь ойида фарзандини тиббий кўрикка олиб келган эркак 7 февраль, шанба куни яна ўғли билан бирга ташриф буюрди. Ўзбекистондаги ҳамма шифохона, банк ва бошқа жойларда бўлгани каби бизнинг клиникада ҳам беморларга навбат бўйича хизмат кўрсатилади. Эркакдан олдин навбатини кутаётган бошқа фуқаролар бор эди. У эса аёлларнинг гапига ҳам қулоқ солмай, хонамга кириб, навбатсиз қубул қилишимни айтди. Унга вазиятни тушунтириб, компьютер орқали кейинги навбатга тайёргарлик кўришни бошладим. Лекин у менга кутилмаганда мушт кўтариб, уришга тушди. Нима бўлаётганини англамай қолдим», — дейди шифокор.
Шавкат Тоштемировнинг айтишича, фуқаро унинг боши ва юз қисмига беш-олти марта мушт туширган, ерга йиқилган пайтида ҳам урган.
Эътиборли жиҳати, бу воқеалар ёш болалар кўз ўнгида бўлиб ўтган.
«Ҳолат соат 12:20 ларда содир бўлди. Бизда тушлик соат 12:00 да бошланади. Навбат кўпайиб кетмасин, одамлар узоқ кутиб қолмасин, деган ниятда ўша куни тушликка вақтида чиқмагандим. Мен унга фақат навбатга туринг дедим, холос. Шу бир оғиз гапим учун калтаклаб, ўнлаб фуқаролар олдида обрўсизлантирди», — дея қўшимча қилди у.
«Мен калтакланаётган вақтда хона эшиги очиқ эди, бемор ўғлини олиб келиб, навбатини кутаётган ички ишлар ходими ва бошқалар хонага кириб, бизни ажратди. Эркак ташқарига чиқиб, яна дўқ-пўписа қилди ва жанжал кўтарди. Биз эшикни ёпиб олдик. Кейин у кўчага чиқиб, машинасига ўтирди-да, оила аъзолари билан кетиб юборди», — дейди шифокор.
Шифокор воқеа жараёнида телефони ва бир қанча тиббий аппаратлар ерга тушиб, сингани, оқибатда 10−15 миллион сўм атрофида моддий зарар ҳам кўрганини айтди. Бундан ташқари, у ўзига ИИБ томонидан ҳимоя ордери тақдим этилмаганидан шикоятчи.
«Ўша заҳоти 102 га қўнғироқ қилдик. Ички ишлар ходимлари етиб келди, менга тилхат, кейинроқ ариза ёздириб олишди. Уларга воқеа акс этган видеони Telegram`дан ташлаб ҳам бердим. Уч кундирки, мени калтаклаган фуқарога чора кўрилгани йўқ. Эшитишимча, бу ишни ёпти-ёпти қилиб юборишмоқчи. Ўзим ҳозир шифохонада даволаняпман», — дейди Шавкат Тоштемиров.
У мазкур ҳолатни шифокорларга нисбатан ҳурматсизлик деб ҳисоблаши ҳамда зўравонга нисбатан чора кўрилиши шартлигини қайд этди.
«Агар беморнинг аҳволи оғир бўлса, уни навбатсиз қабул қиламиз. Буни навбат кутаётганлар ҳам тўғри тушунади. Бироқ эркакнинг ўғли яхши ҳолатда келгани сабабли навбат кутишини айтганман. Лекин у бир оғиз гапим учун безорилик қилди. 12 йиллик фаолиятим давомида бундай ҳолатга тушмагандим. Биз врачларни бу даражада камситиш ва калтаклаш керак эмас-да», — дейди нейрофизиолог.
«Бу одамга қонуний чора кўришларини талаб қиламан. У эртага бошқа врачнинг олдига бориб, яна шундай муносабат қилиши, шубҳасиз. Бундай зўравонларга қонунлар ишлашини кўрсатиб қўйиш керак. Агар бу каби зўравонларга нисбатан чоралар кўрилмаса, жамият шунга ўрганади. Одамлар хоҳлаган пайтида эшикни тепиб кириб, қўпол муомала қилади, шу тариқа, шифокорлар қадри йўқолади», — дейди Шавкат Тоштемиров.
Самарқанд вилояти ИИБ ахборот хизматининг Gazeta сўровига жавобан маълум қилишича, ҳозирда ҳолат бўйича Самарқанд шаҳри ички ишлар органлари фаолиятини мувофиқлаштириш бошқармаси томонидан терговга қадар текширув ишлари олиб борилмоқда.