Халқаро рейтинг агентликлари томонидан Ўзбекистоннинг суверен рейтингининг кўтарилиши ташқи молиявий ресурсларни жалб қилиш харажатларини камайтирди ва ташқи қарзларга хизмат кўрсатиш харажатларини қисқартирди. Бу ҳақда Иқтисодиёт ва молия вазирлиги департаменти бошлиғи ўринбосари Акмалжон Ғаниев 30 январь куни журналистлар билан учрашувда маълум қилди.
Унинг сўзларига кўра, эришилган макроиқтисодий натижалар халқаро ташкилотлар ва рейтинг агентликларининг баҳоларида акс этган.
«Аввало, Fitch, S&P ва Moody’s — халқаро суверен рейтинг агентликлари. Биз улар Ўзбекистон суверен рейтингини ижобий томонга ўзгартирганини кўряпмиз. Рўйхатда келтирилган учта рейтинг агентлигининг деярли ҳаммаси Ўзбекистон рейтингини бир поғонага оширди».
ИМВ вакилининг таъкидлашича, рейтингларнинг яхшиланиши мамлакатнинг халқаро молия бозорларидаги фаолият шароитларига бевосита таъсир кўрсатган.
«Бу, ўз навбатида, биз учун халқаро молия бозорларидаги шароитларнинг яхшиланганидан — қарз олиш имкониятларининг кенгайганидан ёки халқаро молиявий ресурсларга кириш имкониятидан, шунингдек, уларнинг нархининг пасайганидан далолат беради».
Хусусан, рейтингнинг кўтарилиши натижасида хориждан жалб қилинган ресурслар бўйича фоиз ставкаси 1−1,5 фоиз пунктига пасайган, бу ташқи қарзга хизмат кўрсатиш харажатларини йилига 250−300 млн долларга камайтиради.
Эслатиб ўтамиз, S&P халқаро агентлиги 2018 йилдан бери биринчи марта Ўзбекистоннинг кредит рейтингини «BB-»дан «BB»га кўтарди.
Fitch Ratings етти йил ичида биринчи марта Ўзбекистон кредит рейтингини «BB-»дан «BB»га кўтарди.
Moody’s агентлиги Ўзбекистоннинг рейтингини Ba3 даражасида сақлаб қолди, аммо прогнозни «барқарор»дан «ижобий»га кўтарди.
Эслатиб ўтамиз, 1 октябрь ҳолатига кўра, Ўзбекистоннинг ташқи қарзи йил бошидан бери 11,3 млрд долларга ўсиб, 75,4 млрд долларни ташкил этди. Хусусий ва давлат компанияларининг корпоратив қарзи ташқи давлат қарзи ҳажмидан ошиб кетди.