Тошкентнинг Мирзо Улуғбек туманидаги шу номли кўчасида ўрнатилганидан бир ҳафта ўтгач, йўлни ажратиб турувчи панжара демонтаж қилинди. Бироқ бу танқидга жавобан бўлмади.
Gazeta’га маълум бўлишича, панжара керакли баландликдан паст бўлиб чиққан ва у қайтадан ўрнатилади. ИИББ ЙҲХБ ҳам, пойтахт ҳокимлиги ҳам вазиятга изоҳ бермади.
Фото: t.me/mirzoulugbek_tumani.
Улар бизнинг деворларнинг зарари ва хавфи, шунингдек улар туфайли пиёдалар ва автомобиллар кўриниши чекланиши ҳақидаги мақоламиздан кейин ҳам ҳеч қандай баёнот беришмади. Бироқ, ишлар вақтинча тўхтатилди.
Тошкентнинг бошқа туманларида, жумладан Миробод кўчасида, сўнгги кунларда аллақачон ўрнатилган тўсиқлар ҳам тузатилмоқда.
Gazeta билан хусусий суҳбатларда Ўзбекистон ИИВ ЙҲХБ ва шаҳар ҳокимлиги ходимлари пиёдалар ўтиш жойлари, чорраҳалар ва бурилиш жойларидаги тўсиқлар кўринишни чеклаши ва хавф туғдириши мумкинлигини тан олишмоқда.
Нима бўляпти
2017−2018 йилларда ЙҲХБ ва шаҳар ҳокимлиги тўсиқлар ҳайдовчиларга ҳам, пиёдаларга ҳам халақит бераётганини расман тан олган. Энди ЙҲХБ ЙТҲда ўлим ҳолатларини камайтириш учун бу амалиётни тўғри деб ҳисоблаб, уни қайтаришга қарор қилди.
Бир йил олдин Тошкент шаҳар ИИББ ЙҲХБ кўчалар ўртасида яшил ва бошқа рангдаги тўрли панжара («еврозабор») ўрнатишни бошлади, бу ҳеч қандай стандартларда кўзда тутилмаган. Ўзбекистон ҳудудлари ЙҲХБлари амалиётни жуда тез ўзлаштирди.
Биз тўсиқлар ўрнатилиши режалаштирилган кўчалар рўйхатини эълон қилгандик (ўртада ёки четда). Участкаларнинг умумий узунлиги қарийб 20 километрни ташкил этади.
Ижрочи — 6 млрд сўмлик хизматларни таклиф қилган Қарши Строй Сентр компанияси. Шу билан бирга, тендерда иштирок этган еттита компаниянинг барчаси бир тийингача аниқлик билан 6 006 446 265,20 сўм нарх сўрашди.
Мутахассислар тўсиқлар кўчаларни хавфсиз қилмаслигини, қатнов қисмини белгиланмаган жойдан кесиб ўтишнинг асосий сабаби қисқа ва хавфсиз йўлдан қулай ўтиш имконияти йўқлигини кўп бора таъкидлашган.