Кўп квартирали уйларда яшовчи ва марказлашган ичимлик сувидан фойдаланувчи истеъмолчиларга, агар сув ҳисоблагичлари ўрнатилган бўлса, дарахт ва буталарни куннинг исталган вақтида суғоришга рухсат берилади.
Бу ҳақда президентининг 5 февралдаги кўп квартирали уйларни бошқаришни такомиллаштиришга оид қарорида сўз боради.
Ҳужжатда, шунингдек, 2026−2027 йилларда ажратиладиган маблағларнинг (15 баравар миқдорда) камида 10 фоизи кўп квартирали уйларга туташ ҳудудларда дарахт ва буталарни экиш ҳамда уларни суғориш тизими билан таъминлашга йўналтирилиши белгиланган.
Кўп квартирали уйларга туташ ҳудуддаги барча дарахт ва буталар бошқарув компаниялари томонидан хатловдан ўтказилиши лозим, улар ҳақидаги маълумотлар эса «Mening uyim» тизимида акс эттирилиши керак.
Ҳужжатда алоҳида таъкидланишича, «Яшил макон» умуммиллий лойиҳаси доирасида уйлар олдида экилган дарахт ва буталарнинг сақланиши учун Экология, атроф-муҳитни муҳофаза қилиш ва иқлим ўзгариши қўмитаси, Қурилиш ва уй-жой коммунал хизмат кўрсатиш вазирлиги, вилоятлар ва Тошкент шаҳри ҳокимликлари бошқарув компаниялари билан биргаликда масъул ҳисобланади.
Эслатиб ўтамиз, бир неча йил давомида яшил майдонларни суғоришга фақат тунги вақтларда — соат 0:00 дан 5:00 гача рухсат берилган эди. Қоидабузарларга нисбатан жарималар қўлланган. Кўп квартирали уйларда яшовчилар бу тақиқ ҳақида тез-тез салбий фикр билдиришган, чунки суғориш имкони бўлмагани сабабли дарахт ва буталар, жумладан, «Яшил макон» дастури доирасида экилган кўчатлар ҳам қуриб қолаётган эди.
Ўтган йилнинг ноябрь ойида, Тошкентда ҳаво сифатининг кескин ёмонлашуви фонида, жисмоний ва юридик шахсларга тегишли бўлган ер участкаларида баҳор ва ёз ойларида дарахтларни ичимлик суви билан суғоришга қўйилган чеклов бекор қилинди.
Ўша вақтда, шунингдек, кўп квартирали уйлар яқинида ўсимликларни суғориш учун махсус сув резервуарларини ўрнатиш режалаштирилаётгани ҳақида ҳам хабар берилган эди.