1 июлдан бошлаб турар жой мулкдори кўп квартирали уйнинг банк ҳисобварағига мажбурий тўловларни (квартплата) ойнинг 15-санасига қадар амалга оширмаса, унинг электр энергияси учун тўловларини қабул қилиш қарздорлик тўлиқ қоплангунга қадар тўхтатиб қўйилади.
Бу ҳақда президентнинг 5 февралдаги кўп квартирали уйларни бошқариш тизимини такомиллаштиришга оид қарорида сўз боради.
Кўп квартирали уйнинг банк ҳисобварағидаги маблағлар ҳар ойда, биринчи навбатда, уйнинг электр энергияси тўлови учун (подъездлар, зинапоялар, йўлакларни ёритиш, лифтлар ишлаши, уй атрофидаги ҳудудни ёритиш, насослар ва бошқа умумий уй эҳтиёжлари учун) йўналтирилади.
Бундан ташқари, янги тартиб жорий этилмоқда: мулкдор томонидан мажбурий тўловлар кечиктирилган ҳар бир кун учун тўлов суммасидан пеня (жарима) ҳисобланади:
- Юридик шахслар учун — 0,4%;
- Жисмоний шахслар учун — 0,1%.
Бунда пеня миқдори ҳар бир ой учун кечиктирилган тўлов суммасининг 50 фоизидан ошиб кетмаслиги керак.
Ҳисобланган пеня маблағлари тенг улушларда кўп квартирали уйнинг банк ҳисобварағига ҳамда «Mening uyim» тизимини сақлаш харажатларини қоплашга йўналтирилади.
Ушбу санадан бошлаб мажбурий тўловлар фақат банк карталари, электрон тўлов тизимлари ёки банк кассалари орқали амалга оширилади.
Аввалроқ хабар қилинганидек, ушбу ҳужжат билан уйларни таъмирлаш ва уларга туташ ҳудудларни ободонлаштириш дастурлари ҳам режалаштирилган: 1032 та кўп квартирали уйнинг энергия тежамкорлигини оширишга 200 млн доллар миқдоридаги халқаро маблағлар, уйларни таъмирлаш ҳамда инфратузилмани қуриш ва реконструкция қилишга эса 1 трлн сўм йўналтирилади. Кўп квартирали уйларни бошқариш «Mening uyim» тизими орқали рақамлаштирилади.
Gazeta сенаторлар Вазирлар Маҳкамасига бошқарувчи сервис компаниялари хизмат кўрсатиш сифати бўйича сўров юборгани ҳақида ёзганди. Бунга фуқаролардан келиб тушган минглаб шикоятлар, бошқарув компанияларининг мулкдорлар иштирокисиз тайинланиши ҳамда ҳисоботларнинг йўқлиги сабаб бўлган. Сенат раиси буни «одамларнинг кайфиятига тўғридан-тўғри таъсир қиладиган жиддий масала» деб атаган.
Эслатиб ўтамиз, июль ойида чиқинди олиб чиқиш хизматидан қарздорлиги бор шахслар учун электр энергиясига тўлов қилишни вақтинчалик тақиқловчи қонун қабул қилинган эди. 6 декабрь ҳолатига кўра, Ўзбекистонда ушбу хизмат учун қарзини тўламаган 204,8 минг абонентнинг электр энергияси учун тўлов қилиш имконияти вақтинча чеклаб қўйилган.